Тошкентда Cobalt иштирокидаги ЙТҲда бир киши ҳалок бўлди
Маълумотларга кўра, пиёда йўлнинг белгиланмаган қисмидан ўтаётган пайтда ҳодиса юз берган.
Тошкент шаҳрининг Яккасарой туманида пиёда иштирокида содир бўлган йўл-транспорт ҳодисаси оқибатида бир киши ҳалок бўлди.
Тошкент шаҳар ИИББ ЙҲХБ Ахборот хизматининг маълум қилишича, 25 апрель куни соат 17:40 атрофида Яккасарой тумани КХАЙ кўчасида ҳаракатланиб кетаётган 1988 йилда туғилган ҳайдовчи бошқарувидаги Cobalt русумли автомобиль 1948 йилда туғилган пиёдани уриб юборган.
Дастлабки маълумотларга кўра, пиёда йўлнинг белгиланмаган қисмидан ўнг томондан чап томонга ўтаётган вақтида ҳодиса юз берган.
Йўл-транспорт ҳодисаси оқибатида пиёда олган тан жароҳатлари сабаб воқеа жойида вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.
