Ички ишлар вазирига камера ва радарлар фаолияти бўйича парламент сўрови юборилди

 

Олий Мажлис Қонунчилик палатасида Ички ишлар вазири Азиз Тошпўлатовга автомобиль йўлларидаги фото-видео қайд этиш техника воситалари, радарлар ҳамда йўл ҳаракати хавфсизлигини таъминлашдаги самарадорлик юзасидан парламент сўрови юбориш масаласи кўриб чиқилди.

 

Қайд этилишича, сўнгги йилларда мамлакатда транспорт воситалари сонининг кескин ортиши йўл ҳаракати хавфсизлигини таъминлашни давлат сиёсатининг устувор йўналишларидан бирига айлантирган. Шу асосда йўл ҳаракатини автоматлаштирилган тарзда бошқариш, қоидабузарликларни фото-видео қайд этиш тизимларини кенгайтириш, замонавий радар ва камераларни жорий этиш бўйича қатор чора-тадбирлар амалга оширилган.

 

Шунингдек, “Йўл ҳаракати тўғрисида”ги қонун ҳамда Президентнинг бир қатор қарорлари асосида автомобиль йўлларида белгиланган тезликка риоя этилишини стационар ва кўчма радарлар ёрдамида назорат қилиш тизими йўлга қўйилган.

 

Таъкидланишича, мазкур техник воситалар йўл-транспорт ҳодисаларининг олдини олиш, ҳайдовчилар масъулиятини ошириш, қоидабузарликлар сонини камайтириш ҳамда коррупцион ҳолатларнинг олдини олишда муҳим восита бўлиб хизмат қилмоқда.

 

Бироқ ҳудудларда сайловчилар билан ўтказилган учрашувлар ва фуқаролар мурожаатлари давомида ушбу тизим фаолиятига оид қатор эътирозлар ҳам билдирилган. Хусусан, рухсат этилган тезлик кескин ўзгарадиган йўл участкаларида белгилар етарлича кўринмайдиган жойларга ўрнатилгани, айрим ҳолларда радарлар жойлашуви бўйича саволлар мавжудлиги қайд этилган.

 

Бундан ташқари, фото-видео қайд этиш тизимида маълумотларни қайта ишлаш жараёнида техник хатолар туфайли асоссиз жарималар қўлланаётгани, айрим йўлларда асфальт сифати талабга жавоб бермаслиги, йўл чизиқлари кўринмаслиги ёки нотўғри чизилгани, пиёдалар ўтиш жойларида светофорлар етишмаслиги каби муаммолар фуқаролар норозилигига сабаб бўлаётгани таъкидланди.

 

Шу муносабат билан депутатлар Ички ишлар вазирлигидан “Хавфсиз ва равон йўл” умуммиллий дастури ижроси, йўл инфратузилмасини ривожлантириш лойиҳаларини молиялаштириш, радар ва камераларнинг самарадорлиги, жарималар ҳисобланиши шаффофлиги ҳамда мавжуд камчиликларни бартараф этиш бўйича асослантирилган тушунтиришлар тақдим этишни сўради.