Самарқандда болани урган хусусий боғча тарбиячиси ишдан олинди
Ҳозирда ушбу воқеа бўйича ҳуқуқни муҳофаза қилувчи органлар томонидан қўшимча текширув ишлари олиб борилмоқда.
Самарқанд вилоятининг Ургут туманида жойлашган хусусий мактабгача таълим муассасасида тарбиячининг болага нисбатан қўл кўтаргани акс этган видеотасвирлар ижтимоий тармоқларда кенг муҳокамаларга сабаб бўлди. Ҳолат юзасидан масъул ташкилотлар томонидан расмий ўрганиш ишлари олиб борилди.
Вилоят Мактабгача ва мактаб таълими бошқармаси маълум қилишича, воқеа “Мадина Кўзмунчоқ” нодавлат мактабгача таълим муассасасида содир бўлган. Мазкур таълим ташкилоти 2019 йил август ойидан буён лицензия асосида фаолият юритиб келмоқда.
Ҳозирги вақтда муассасада 6 та гуруҳ фаолият юритиб, жами 147 нафар тарбияланувчи таълим-тарбия олмоқда.
Ўрганишлар давомида аниқланишича, жорий йилнинг 20 апрель куни ўрта гуруҳ тарбиячиси М.Д. томонидан тарбияланувчига нисбатан жисмоний зўравонлик содир этилган.
Мазкур ҳолат юзасидан 2026 йил 23 апрель куни ташкилот раҳбарининг буйруғи асосида тарбиячи M.Д. билан тузилган меҳнат шартномаси бекор қилинган.
Ҳозирда ушбу воқеа бўйича ҳуқуқни муҳофаза қилувчи органлар томонидан қўшимча текширув ишлари олиб борилмоқда.
