Кўксарой қароргоҳида Чехия бош вазири кутиб олинди
Ўзбекистон ва Чехия ўртасида музокаралар бошланди.
30 апрель куни Кўксарой қароргоҳида Ўзбекистонга расмий ташриф билан келган Чехия Республикаси Бош вазири Андрей Бабишни расмий кутиб олиш маросими бўлиб ўтди. Бу ҳақда Ўзбекистон Президенти матбуот хизмати хабар берди.
Маълум қилинишича, қароргоҳ олдидаги майдонда фахрий қоровул саф тортди. Ўзбекистон Республикаси Президенти Шавкат Мирзиёев олий мартабали меҳмонни самимий қутлаб, уни шоҳсупага таклиф қилди.
Ҳарбий оркестр ижросида Ўзбекистон ва Чехия давлат мадҳиялари янгради. Етакчилар фахрий қоровул сафи олдидан ўтиб, расмий делегациялар аъзоларини қутладилар.
Маросим якунида биргаликда суратга тушилгандан сўнг олий даражадаги музокаралар бошланди.
