Тошкентда “Glamour Gold” қурилиш компанияси 300 га яқин кишини уйсиз қолдирди

Тошкент шаҳрида янги уй сотиб олиш ниятида бўлган қарийб 300 нафар фуқарони алдаган Glamour Gold мансабдорларига нисбатан жиноят иши тергов қилинди. Бу ҳақда Тошкент шаҳар ИИББ матбуот хизмати хабар берди.

 

Маълум қилинишича, Glamour Gold МЧЖ томонидан амалга оширилган “Ecodream” турар жой мажмуаси қурилиши лойиҳаси доирасида жами 274 нафар фуқаро фирибгарлик қурбонига айланган. Улар томонидан уй сотиб олиш учун тўланган маблағлар қайтарилмаган.

 

Тергов ҳужжатларига кўра, 2020 йил 16 март ҳолатига мазкур қурилиш учун 37 млрд 400 млн сўм сарфланган. Қолган маблағлар эса мақсадли йўналишда ишлатилмай, талон-торож қилинган. Оқибатда, фуқароларга етказилган умумий моддий зарар 97 млрд сўмни ташкил этган. Олти йил аввал бошланган мазкур қурилиш лойиҳаси амалда сохта схема экани маълум бўлган.

 

Зарарни қоплаш мақсадида гумондорларга тегишли бўлган умумий қиймати 65 млрд 582 млн сўмлик кўчмас мулклар, транспорт воситалари ва бошқа мол-мулклар хатланиб, тақиқ қўйилган.

 

Жабрланувчилардан бирига кўра, қурилиш жараёнининг кечикиши турли баҳоналар билан изоҳланган.

 

Ҳозирда компаниянинг тўққиз нафар масъул шахсига нисбатан Ўзбекистон Республикаси Жиноят кодексининг 167-моддаси 3-қисми (ўзлаштириш ёки растрата), 168-моддаси 4-қисми “а”, “в” бандлари (фирибгарлик), 228-моддаси 2 ва 3-қисмлари (ҳужжатларни қалбакилаштириш),  192-11-моддаси 2-қисми “а”, “б” бандлари (мансаб ваколатларини суиистеъмол қилиш) билан айблов эълон қилинган.

 

Мазкур шахсларга нисбатан қамоққа олиш тарзидаги эҳтиёт чораси қўлланган.

 

Ҳуқуқни муҳофаза қилувчи органлар ушбу компаниядан жабр кўрган бошқа фуқаролар бўлса, Тошкент шаҳар ИИББ ҳузуридаги Тергов бошқармасига мурожаат қилишларини сўрамоқда.