Бухорода эркакни “шантаж” қилган аёллар ушланди
Аёллардан бири эркак билан ишқий муносабатда бўлган ва ёзишмаларни тарқатмаслик учун пул талаб қилган.
Бухоро вилояти Вобкент туманида икки аёл ўзаро тил бириктириб, оилали эркакни шантаж қилиш орқали пул талаб қилгани учун қўлга олинди. Бу ҳақда вилоят ИИБ хабар берди.
Маълум қилинишича, жабрланувчи эркак ва 1991 йилда Қоракўл туманида туғилган аёл ўртасида ишқий муносабатдаги ёзишмалар бўлган. Ушбу ёзишмаларни аёлнинг дугонаси кўриб қолган ва уларни ошкор қилиш билан унга таҳдид қилган. Дастлаб аёл дугонасига пул бериб, вазиятни ёпишга уринган.
Кейинчалик икки аёл ўзаро тил бириктириб, ушбу ҳолатдан моддий манфаат кўришни режалаштирган. Аёл эркак билан боғланиб, ёзишмалар ошкор этилиши мумкинлигини билдириб, унга босим ўтказган. Улар сирни эркакнинг оиласи ва турмуш ўртоғига етказиш билан қўрқитиб, жами 6 млн 800 минг сўм миқдорида пул талаб қилган.
Тезкор тадбир давомида гумонланувчи аёллардан бири эркакка тегишли автомобилда 100 АҚШ доллари ва 5 млн 600 минг сўмни олаётган вақтида ашёвий далиллар билан ушланган.
Мазкур ҳолат юзасидан Жиноят кодексининг 165-моддаси (товламачилик) 2-қисми “в” банди билан жиноят иши қўзғатилиб, тергов ҳаракатлари олиб борилмоқда.
