Наманганда аёлларни фоҳишаликка юбориб келган жиноий гуруҳ ушланди

Наманган вилоятида аёлларни хорижга олиб чиқиб, фоҳишаликка юбориш билан шуғулланган жиноий гуруҳ фош бўлди. Бу ҳақда Ички ишлар вазирлиги хабар берди.

 

Маълум қилинишича, 26 апрель куни Поп туманида ўтказилган тезкор тадбир давомида Давлатобод туманида яшовчи айрим аёллар ўзларини турли исмлар — Наргиза, Мафтуна ва Малика деб таништириб, фуқаролар ишончига киргани аниқланган. Улар Давлатобод тумани “Юксалиш” маҳалласида яшовчи бошқа аёл билан тил бириктириб, жиноий фаолият юритган.

 

Тергов маълумотларига кўра, гуруҳ воситачилар орқали асосан ёш, турмушдан ажраган ва ижтимоий ҳимояга муҳтож аёлларни нишонга олган. Улар хориждаги шериклари орқали иш ва юқори даромад ваъдаси билан аёлларни алдаб, чет элга олиб чиқиш ва фоҳишаликка жалб қилиш билан шуғулланган.

 

Тезкор тадбир ўтказилган куни Давлатобод туманида яшовчи, 2001 йилда туғилган аёлни Ҳиндистонга фоҳишалик учун юборишга уриниш вақтида гуруҳ аъзолари қўлга олинган.

 

Мазкур ҳолат юзасидан Ўзбекистон Республикаси Жиноят кодексининг 135-моддаси 2-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

 

Ички ишлар вазирлиги фуқароларни, айниқса хорижда ишлаш билан боғлиқ шубҳали таклифларга ишонмасликка чақирди. Шунингдек, ноқонуний ҳолатлар ҳақида маълумотга эга бўлган шахслардан зудлик билан ҳуқуқни муҳофаза қилувчи органларга мурожаат қилиш сўралди.

 

Аввалроқ Тошкентда 4 нафар қизни алдаб, улардан бирини Дубайга олиб кетаётган аёл аэропортда қўлга олингани ҳақида хабар берилганди.