Эрон уруш оқибатида етказилган зарарни 270 млрд долларга баҳоламоқда
Дастлабки ҳисоб-китобларга кўра, зарар ЯИМнинг 60 фоизига тенг.
Эрон ҳукумати АҚШ ва Исроил билан юзага келган ҳарбий қарама-қаршиликлар оқибатида мамлакат инфратузилмасига етказилган зарар миқдорини баҳолаш жараёнини давом эттирмоқда. Бу ҳақда Эрон ҳукумати вакили Фотима Муҳажироний Азад Iran телеграм каналига маълум қилган.
Маълум қилинишича, тахминан 40 кун давом этган ҳарбий ҳаракатлар натижасида Эрон инфратузилмасига етказилган зарар дастлабки ҳисоб-китобларга кўра 270 миллиард долларни ташкил этмоқда. Мазкур рақам тўғридан-тўғри ва билвосита йўқотишларни ўз ичига олган бўлиб, якуний эмаслиги таъкидланган.
Эрон ҳукумати вакили Фотима Муҳажироний қайд этишича, зарар кўлами якуний баҳолашлар натижасида янада ортиши мумкин.
Таҳлилларга кўра, ушбу зарар мамлакат ялпи ички маҳсулотининг қарийб 60 фоизига тенг келади. Маълумот учун, Эроннинг ЯИМ ҳажми тахминан 450 миллиард доллар атрофида баҳоланмоқда.
