Оҳангаронда ИИБ ходимини педофилияликда айблаган йигит 7 суткага қамалди
18 ёшли фуқаро ижтимоий тармоқларда тарқатган ёлғон маълумоти учун жазоланди.
Тошкент вилояти Оҳангарон шаҳрида ички ишлар органи ходимини асоссиз равишда педофилияликда айблаб, ёлғон ахборот тарқатган 18 ёшли фуқаро маъмурий жавобгарликка тортилди. Бу ҳақда вилоят ИИББ матбуот хизмати маълум қилди.
Қайд этилишича, мазкур шахс ижтимоий тармоқларда видео тарқатиб, ички ишлар ходимини вояга етмаган қизга нисбатан ноқонуний ҳаракатларда айблаган.
Ҳолат юзасидан аниқлик киритиш мақсадида у ички ишлар бўлимига чақирилган. Бироқ фуқаро ходимларнинг қонуний талабларига бўйсунмасдан, бино ҳудудида жанжал кўтарган.
Ўтказилган суриштирувлар давомида фуқаро ўзи тарқатган маълумотлар ҳақиқатга тўғри келмаслигини тан олган.
Суд қарорига кўра, ушбу шахс ҳамда унинг икки нафар шеригига нисбатан Маъмурий жавобгарлик тўғрисидаги кодекснинг 183, 194 ва 195-моддалари асосида 7 суткадан маъмурий қамоқ жазоси тайинланди.
Маълум қилинишича, ҳолат юзасидан қўшимча тергов ҳаракатлари давом эттирилмоқда. Жумладан, ички ишлар ходимини қасддан обрўсизлантириш, интернет орқали ёлғон ахборот тарқатиш ҳамда транспорт воситасига зарар етказиш ҳолатлари бўйича текширув олиб борилмоқда.
