Ўзбекистон Президенти Япония молия вазири бошчилигидаги делегацияни қабул қилди
Президент молия соҳасига сунъий интеллектни жорий этиш ва рақамли трансформацияни чуқурлаштириш бўйича таклифлар илгари сурди.
Ўзбекистон Президенти Шавкат Мирзиёев Осиё тараққиёт банки Бошқарувчилар кенгашининг йиғилиши доирасида Япония молия вазири Сатсуки Катаяма бошчилигидаги делегацияни қабул қилди.
Учрашувда Япония халқаро ҳамкорлик банки (JBIC) бошқарувчиси Нобумитсу Хаяси ва Япония халқаро ҳамкорлик агентлиги (JICA) катта вице-президенти Масао Яҳара ҳам иштирок этишди.
Суҳбат аввалида юқори мартабали меҳмон мамлакат етакчисига Япония Бош вазири Санаэ Такаичининг саломи ва самимий тилакларини етказди.
Ўзбекистон раҳбарининг 2025 йил декабрь ойида Японияга амалга оширган ташрифи икки томонлама муносабатларда янги даврни бошлаб бергани таъкидланди.
Мулоқот чоғида иқтисодий ҳамкорликнинг ижобий суръатлари алоҳида қайд этилди. Товар айирбошлаш ҳажми ормоқда, Япониянинг етакчи компаниялари иштирокида йирик инвестиция лойиҳалари амалга оширилмоқда.
Ўзбекистон Президенти мамлакат молия тизимини модернизация қилиш, хусусан, ғазначилик соҳасига сунъий интеллектни жорий этиш, рақамли молия трансформацияси ва ушбу йўналишда юқори малакали мутахассисларни тайёрлаш бўйича бир қатор истиқболли таклифларни илгари сурди.
Қайта тикланувчи энергия, тиббиёт, ахборот технологиялари, транспорт ва қишлоқ хўжалиги соҳаларидаги ижтимоий аҳамиятга эга лойиҳаларни жадаллаштиришга келишиб олинди.
