Ўзбекистон ва ОТБ ўртасидаги умумий лойиҳа портфели 16 млрд долларга етди

Ўзбекистон Президенти Шавкат Мирзиёев Самарқанд шаҳрига ташрифи доирасида Осиё тараққиёт банки президенти Масато Канда бошчилигидаги делегацияни қабул қилди.

 

Учрашув аввалида банк раҳбари Ўзбекистонда ОТБ Бошқарувчилар кенгашининг 59 йиллик йиғилишини ўтказишга кўрсатилган юксак даражадаги қўллаб-қувватлаш ва ташкилий ёрдам учун давлат раҳбарига самимий миннатдорлик билдирди.

 

Музокаралар чоғида Ўзбекистон ва Осиё тараққиёт банки ўртасидаги ўзаро манфаатли ҳамкорликни янада кенгайтиришнинг устувор йўналишлари муҳокама қилинди.

 

Сўнгги йилларда ҳамкорлик сифат жиҳатидан янги босқичга кўтарилгани алоҳида таъкидланди.

Ўтган давр мобайнида ОТБ мамлакатимизнинг ишончли стратегик шеригига айлангани қайд этилди.

 

Бугунги кунда умумий қиймати қарийб 16 миллиард долларга тенг лойиҳалар портфели шакллантирилган бўлиб, Ўзбекистон банкнинг минтақадаги энг йирик ҳамкорларидан бири ҳисобланади.

 

Ҳамкорлик доирасида транспорт инфратузилмасини ривожлантириш, энергетика тизимини модернизация қилиш, ижтимоий соҳани қўллаб-қувватлаш, сув таъминоти ва канализация тармоқларини янгилаш, қишлоқ хўжалиги ҳамда хусусий секторни ривожлантиришга қаратилган қатор йирик лойиҳалар амалга оширилмоқда.

 

Томонлар 2030 йилгача мўлжалланган янги шериклик дастури доирасида умумий қиймати 12,5 миллиард долларлик лойиҳаларни самарали ва ўз вақтида амалга ошириш муҳимлигини қайд этдилар.

 

Шунингдек, ипотека бозори, хусусий секторни қўллаб-қувватлаш, ёшлар ва аёллар тадбиркорлигини ривожлантириш, камбағалликни қисқартириш, инклюзив таълимни кенгайтириш, инсон капиталини ривожлантириш ҳамда рақамли инновацияларни жорий этиш каби устувор йўналишларда ҳамкорликни кенгайтиришга келишиб олинди.

 

Марказий Осиёда йирик инфратузилмавий лойиҳаларни илгари суриш ва инвестицияларни сафарбар этишда ОТБнинг ролини янада кучайтириш зарурлиги алоҳида таъкидланди.

Учрашув якунида 2030 йилгача мўлжалланган шериклик дастурини алмашиш маросими бўлиб ўтди.