Даромади ўртачадан юқори давлатлар қаторига киришни мақсад қилганмиз — Шавкат Мирзиёев
Ўзбекистонда 2030 йилга қадар иқтисодиёт ҳажмини 240 миллиард доллардан ошириш режалаштирилмоқда.
Глобал беқарорлик шароитига қарамасдан, Ўзбекистон иқтисодиёти 2026 йилнинг биринчи чораги якунларига кўра 8,7 фоизлик ўсишга эришди. Бу ҳақда Президент матбуот хизмати ёзмоқда.
Президент Шавкат Мирзиёевнинг таъкидлашича, амалга оширилаётган ислоҳотларда аҳолининг турмуш даражасини ошириш устувор йўналиш сифатида белгиланган. Сўнгги йилларда 8,5 миллион эҳтиёжманд аҳолининг даромадлари оширилиб, камбағаллик даражаси тахминан 35 фоиздан 5,8 фоизгача қисқартирилган.
Қайд этилишича, Ўзбекистон сўнгги ўн йилда Барқарор ривожланиш мақсадларига эришишда энг катта ижобий ўзгаришларга эришган бешта давлат қаторига кирган.
Шунингдек, 2030 йилга қадар барча соҳаларни технологик ва инновацион ўсиш моделига ўтказиш орқали иқтисодиёт ҳажмини 240 миллиард доллардан ошириш режалаштирилмоқда. Бу орқали мамлакатни даромади ўртачадан юқори давлатлар қаторига қўшиш ва камбағалликка тўлиқ барҳам бериш мақсад қилинган.
“Натижада даромади ўртачадан юқори давлатлар қаторига киришни ҳамда камбағалликка тўлиқ барҳам беришни мақсад қилганмиз”, — деди Президент.
Давлат раҳбари, шунингдек, яқин кунларда 13 та йирик стратегик корхона активларини ўз ичига олган “Миллий инвестиция жамғармаси”нинг 30 фоиз улуши халқаро фонд бозорига чиқарилишини маълум қилди.
Унинг сўзларига кўра, мазкур қадам мамлакатнинг инвестиция муҳитига бўлган ишончни янада мустаҳкамлашга хизмат қилади.
