Менингококк бўйича мурожаатлар келиб тушмоқда — Санэпидқўмита

 

Сўнгги кунларда аҳоли орасида менингококк инфекцияси билан боғлиқ мурожаатлар кўпайиб бораётгани муносабати билан Санитария-эпидемиология қўмитаси расмий баёнот билан чиқди.

 

Қайд этилишича, ушбу инфекция дунёнинг кўплаб мамлакатларида бўлгани каби Ўзбекистонда ҳам мавсумий характерга эга бўлиб, асосан куз ва баҳор ойларида, хусусан февраль–март даврида кўпроқ учрайди.

 

Ҳозирда республикада эпидемиологик вазият устидан доимий назорат ўрнатилган. Барқарорликни таъминлаш мақсадида кенг қамровли профилактик ҳамда санитария-эпидемиологик чора-тадбирлар изчил амалга оширилмоқда.

 

Маълумотларга кўра, беморлар билан мулоқотда бўлган шахслар тўлиқ эмлаш билан қамраб олинган ва улар орасида касалланиш ҳолатлари қайд этилмаган. Тиббий қарши кўрсатмаси мавжуд фуқаролар эса шифокорлар назорати остида кимёвий профилактика билан таъминланмоқда.

 

Мутахассислар касалликнинг асосий аломатлари сифатида юқори иситма, кучли бош оғриғи, бўйиннинг қотиши, кўнгил айниши, ёруғликка сезгирлик, уйқучанлик, умумий ҳолсизлик, тутқаноқ ва айрим ҳолатларда тошмалар пайдо бўлишини кўрсатмоқда. Болаларда эса тинмай йиғлаш, овқатдан бош тортиш ва кескин уйқучанлик ёки қўзғалувчанлик, танада қаттиқлик кузатилиши мумкин.

 

Фуқароларга мазкур белгилар кузатилганда дарҳол тиббий муассасаларга мурожаат қилиш тавсия этилди.

 

Касалликнинг олдини олиш учун шахсий гигиенага риоя қилиш, оммавий жойларда эҳтиёт чораларини кўриш, ʼʼҲажʼʼ ва ʼʼУмраʼʼ сафарларига чиқишдан олдин эмланиш, ихтиёрий эмланишдан ўтиш ҳамда шифокор тавсияларига амал қилиш муҳимлиги таъкидланди.

 

Айни пайтда республика бўйлаб вакцинация марказларида етарли миқдорда вакциналар мавжуд бўлиб, аҳолини эмлаш учун барча шароитлар яратилган.

 

Санепидқўмита фуқароларни ортиқча хавотирга тушмасликка, вазият барқарорлигини инобатга олиб, фақат расмий ва ишончли манбаларга таянишга чақирди.