Покистонда 21 йил ноқонуний яшаган аёл Ўзбекистонга қайтарилди

Покистон ҳудудида узоқ йиллар давомида ноқонуний яшаб келган Ўзбекистон фуқароси дипломатлар кўмагида ватанга қайтарилди. Бу ҳақда "Дунё" ахборот агентлиги хабар берди.

 

Маълум қилинишича, аёл жорий йил февраль ойида Ўзбекистонга қайтишда ёрдам сўраб элчихонага мурожаат қилган. Суҳбат давомида у 2005 йилдан буён Покистонда визасиз яшаб келаётгани ва оғир ижтимоий аҳволга тушиб қолгани аниқланган.

 

Аёлнинг сўзларига кўра, у 2005 йилда Покистон фуқароси билан турмуш қуриш мақсадида ушбу мамлакатга келган. Шу йилнинг ўзида турмуш ўртоғи йўл-транспорт ҳодисасига учраб, ногирон бўлиб қолган. Шундан буён у турмуш ўртоғини парваришлаб келган. Ҳозирги кунда эрининг саломатлиги нисбатан яхшиланган бўлса-да, ногиронлик ҳолати қисман сақланиб қолган. Оиланинг ижтимоий ва молиявий аҳволи эса оғирлигича қолмоқда.

 

Ўрганишлар натижасида фуқаронинг молиявий имкониятлари чеклангани, у фақат кундалик эҳтиёжларни қоплаш имконига эга экани маълум бўлган.

 

Шундан сўнг элчихона томонидан унинг шахси ва фуқаролиги тасдиқланиб, Ўзбекистонга қайтиш учун махсус сертификат расмийлаштирилди. Покистон Ички ишлар вазирлиги билан олиб борилган музокаралар натижасида 21 йил давомида визасиз яшагани учун белгиланган 8400 АҚШ доллари миқдоридаги жарима бекор қилинди ва мамлакатни тарк этишга рухсат берилди.

 

Шунингдек, дипломатик миссия кўмагида фуқаро учун авиачипта харид қилиниб, у 2 май куни Uzbekistan Airways авиакомпаниясининг “Исломобод–Тошкент” рейси орқали ватанга қайтарилди.