Тошкентдаги айрим мактабларда давомат “ақлли” камералар орқали назорат қилинaди
Ижтимоий тармоқларда тарқалган хабарлар юзасидан расмий муносабат билдирилди.
Ижтимоий тармоқларда мактаб ўқувчилари давоматини “ақлли” камералар орқали назорат қилиш жорий этилиши ҳақидаги хабарлар муҳокамаларга сабаб бўлди. Ҳолат юзасидан Мактабгача ва мактаб таълими вазирлиги расмий изоҳ берди.
Маълум қилинишича, айни пайтда Тошкент шаҳрининг Мирзо Улуғбек туманидаги айрим мактабларда “ақлли” камералар синов тариқасида ўрнатилмоқда. Улар давоматни назорат қилиш жараёнини янада самарали ташкил этишга ёрдам бериши кутилмоқда.
Қайд этилишича, бундай технологиялар нафақат мактаб маъмурияти, балки ота-оналар учун ҳам фарзандларнинг дарсларга қатнашиши ва хавфсизлигини онлайн назорат қилиш имконини яратади.
Мактабгача ва мактаб таълими вазирлиги, Ички ишлар вазирлиги, Мудофаа вазирлиги ҳамда Ўзбекистон маҳаллалари уюшмасининг 2025 йил 18 сентябрдаги қўшма қарори билан тасдиқланган низомга кўра, ўқувчиларнинг давоматини ҳисобга олиш ҳозирда e-maktab платформаси орқали амалга оширилади. Унга мувофиқ, ҳар бир синфда давомат фан ўқитувчилари ва синф раҳбарлари томонидан ҳар куни белгиланади.
Низомга асосан, мактабда фаолият юритувчи инспектор-психолог сабабсиз дарс қолдираётган ўқувчиларнинг ота-оналарига ёки уларнинг ўрнини босувчи шахсларга расмий огоҳлантириш юборади.
Унда фарзанднинг мактабга мунтазам қатнашишини таъминлаш талаби қўйилади ҳамда бу мажбурият бажарилмаса, қонунчиликка мувофиқ жавобгарлик келиб чиқиши мумкинлиги ҳақида огоҳлантирилади.
Шунингдек, ўқувчиларнинг дарсларга мунтазам қатнашмаслиги аниқланганда, ота-оналар ёки уларнинг ўрнини босувчи шахслар Маъмурий жавобгарлик тўғрисидаги кодекснинг 47-моддасига асосан жавобгарликка тортилиши мумкин.
