АҚШ Яқин Шарққа 50 мингга яқин ҳарбий жойлаштирган — ОАВ
Қўшинлар Эронга қарши ҳарбий операциялар учун Саудия Арабистони, Баҳрайн, Ироқ, Сурия, Иордания, Қатар, БАА ва Кувайтдаги базаларга жойлаштирилган.
АҚШ президенти Доналд Трaмп маъмурияти Эронга қарши эҳтимолий ҳарбий операциялар фонида Яқин Шарқдаги америкалик ҳарбийлар сонини 50 мингдан оширгани айтилмоқда. Бу ҳақда Point.md хабар берди.
Нашр маълумотига кўра, АҚШ Ҳарбий-денгиз кучлари Ҳормуз бўғозида блокадани давом эттирмоқда. Минтақада авиаташувчилар, эсминецлар, денгиз пиёдалари экспедицион бўлинмалари ва жанговар самолётлар жанговар шай ҳолатга келтирилган.
Оқ уй ва Пентагон вакиллари операциянинг ҳозирги босқичи юзасидан турлича баёнотлар бермоқда. АҚШ давлат котиби Марко Рубио “Эпик ғазаб” операцияси якунланганини билдирган. Мудофаа вазири Пет Ҳегсет эса асосий эътибор кемаларнинг Ҳормуз бўғози орқали хавфсиз ҳаракатланишини таъминлашга қаратилганини айтган.
Кейинчалик Трамп агар Эрон “келишилган шартларни” қабул қилса, урушни якунлаш ва бўғоз орқали хавфсиз кемалар қатновини таъминлашини маълум қилган. У акс ҳолда Эронга қарши бомбардимонлар бошланиши мумкинлигини ҳам таъкидлаган.
Мақолада қайд этилишича, АҚШ Ҳарбий-денгиз кучлари Эрон портларига кирувчи ва чиқувчи кемалар устидан назоратни кучайтирган. Чоршанба куни АҚШ денгиз авиацияси блокадани ёриб ўтишга уринган Эрон байроғи остидаги нефть танкерини тўхтатгани айтилмоқда.
Уруш бошланишидан аввал Яқин Шарқдаги АҚШ ҳарбий контингенти тахминан 40 минг кишидан иборат бўлган. Кейинчалик бу рақам 50 мингдан ошган. Қўшинлар Саудия Арабистони, Баҳрайн, Ироқ, Сурия, Иордания, Қатар, БАА ва Кувайтдаги базаларда жойлаштирилган.
Шунингдек, АҚШнинг 82-ҳаво десант дивизиясидан 2 мингга яқин ҳарбий минтақага юборилгани айтилмоқда. Нашрга кўра, улар Эроннинг нефть экспорти учун муҳим ҳисобланган Харг оролини эгаллаш ёки ҳарбий аэродромларни назоратга олиш операцияларида иштирок этиши мумкин.
Бундан ташқари, 31-экспедицион денгиз пиёдалари отряди ҳамда АҚШ махсус операциялар кучлари ҳам минтақага жойлаштирилган. Махсус кучлар Исфаҳондаги ядровий объектларга қарши эҳтимолий операцияларда қўлланиши мумкинлиги қайд этилган.
Айни пайтда USS Abraham Lincoln ва USS George H.W. Буш авиаташувчи зарба гуруҳлари Араб денгизига жойлаштирилган.
Нашр уларнинг ракета ва қирувчи самолётлар ёрдамида Эронга зарба бериш имкониятига эга эканини ёзган.
