Каркидон туризм мажмуаси: табиат ва замонавийлик уйғунлашган маскан
Ўзбекистон Президентининг 2025 йил 1 апрелдаги қарорига мувофиқ, бу ерда қиймати 635 миллиард сўмлик замонавий туризм мажмуаси шакллантирилмоқда.
Ўзбекистон Журналистлар уюшмаси, Контент тайёрлаш маркази ва Фарғона вилояти ҳокимлиги ҳамкорлигида журналистлар учун “Фарғонада янги Ўзбекистон нафаси” шиори остида пресс-тур ташкил қилинди. Пресс-тур давомида Каркидон сув омборига борилди.
Каркидон сув омбори ҳудуди яқин йилларда Фарғона водийсининг энг йирик ва замонавий экотуризм масканларидан бирига айланиши кутилмоқда. Давлат раҳбарининг 2025 йил 1 апрелдаги қарорига мувофиқ, бу ерда қиймати 635 миллиард сўмлик замонавий туризм мажмуаси шакллантирилмоқда.
508 гектар майдонни қамраб олган лойиҳа доирасида агротуризм, экотуризм ва экстремал туризм йўналишлари бирлаштирилган бўлиб, ҳудудда кенг кўламли ободонлаштириш ишлари олиб борилмоқда. Мажмуа учун ишлаб чиқилган мастер-режага асосан, дастлабки босқичда 250 гектар майдон ўзлаштирилган. Сув омбори атрофига 110 мингдан ортиқ манзарали дарахт ва кўчатлар экилиб, 13 та тик қудуқ қазилган ҳамда томчилатиб суғориш тизими йўлга қўйилган.
Мажмуага кириш қисмида 30 гектар майдонда барпо этилган лавандазор сайёҳлар эътиборини тортади. Ҳудудда меҳмонлар учун 25 та замонавий шале уйлари қурилган бўлиб, улар оилавий ва гуруҳ тарзида дам олиш учун мўлжалланган.
Комплекснинг марказий қисмида 48 гектарлик “Сокин ҳудуд” ташкил этилган. Ушбу ҳудудда сунъий кўл, сайр қилиш учун 6 километрдан ортиқ пиёдалар йўлаги ҳамда узунлиги 420 метр бўлган замонавий кўприк қурилган. Бундан ташқари, болалар майдончалари, wоркоут зоналари ва шахмат майдонлари ҳам ташкил этилган.
Ҳудуддаги энг йирик лойиҳалардан бири — 12 гектар майдондаги гуллар боғи ҳисобланади. Мазкур лойиҳа Dubai Miracle Garden'дан илҳомланган ҳолда ишлаб чиқилган бўлиб, ҳажми жиҳатидан ундан икки баравар катта бўлиши режалаштирилган. Ҳозирда боғ ҳудудида бетонлаштириш ва пиёдалар йўлаклари қурилиши якунланиб, объектларни жойлаштириш ишлари давом этмоқда.
Мажмуада гастрономик ҳудуд ҳам ташкил этилиб, унда миллий ва хорижий таомлар таклиф қилувчи 12 та кафе ва ресторан фаолият юритади. Шунингдек, лойиҳа доирасида 45 та шале, 57 та замонавий меҳмон уйи, экобозор ва агротуризм масканлари барпо этилган.
Келгусида ҳудудда мотокросс майдонлари, 2 километрлик дор йўли, картинг ҳамда гольф майдонларини қуриш режалаштирилган. Бу эса Каркидон сув омборини фаол туризм йўналишидаги етакчи масканлардан бирига айлантириши кутилмоқда.
Лойиҳа доирасида 100 дан ортиқ тадбиркорлик субъекти ташкил этилиб, қарийб 2 мингта янги иш ўрни яратилади. Мажмуа йилига 750 минг нафар сайёҳни қабул қилиши, 3 миллиард сўмлик бюджет тушуми ҳамда 5 миллион долларлик хизматлар экспортини таъминлаши режалаштирилган. Комплекс 2027 йилдан бошлаб тўлиқ қувватда ишга туширилади.
