Путин Президент Шавкат Мирзиёевга миннатдорлик билдирди
Россия президенти Ўзбекистон раҳбарининг ташқи босимларга қарамай Москвага келганини алоҳида таъкидлади.
Россия президенти Владимир Путин Ўзбекистон Президенти Шавкат Мирзиёевнинг 9 май куни Москва шаҳрига ташрифини юқори баҳолаб, уни икки давлат ўртасидаги алоҳида муносабатларнинг ёрқин ифодаси деб атади. Бу ҳақда Россия президенти матбуот хизмати хабар берди.
Икки давлат раҳбарлари ўртасидаги учрашув чоғида Путин бугунги мураккаб халқаро шароитда ўтказилаётган учрашувлар нафақат дўстлик, балки қардошлик ҳамкорлигининг ҳам муҳим белгиси эканини таъкидлаган.
Россия раҳбари Шавкат Мирзиёевнинг “ташқи сигналлар ва таҳдидларга қарамай” Москвага ташриф буюрганини алоҳида қайд этиб, Ўзбекистон президентига дўстлик ва Ғалаба тадбирларидаги иштироки учун миннатдорлик билдирган.
Шунингдек, Владимир Путин Ўзбекистон билан стратегик шериклик ва иттифоқчилик муносабатлари изчил ривожланаётганини таъкидлаган.
Эслатиб ўтамиз, 8 май куни Ўзбекистон Президенти амалий ташриф билан Москва шаҳрига жўнаб кетгани ва ташриф дастурига мувофиқ, давлат раҳбари Иккинчи жаҳон урушидаги ғалабанинг 81 йиллигига бағишланган тантанали тадбирларда иштирок этгани хабар берилган эди.
