Хантавируснинг Ўзбекистонда тарқалиш эҳтимоли борми?

 

Сўнгги кунларда ижтимоий тармоқларда айрим давлатларда хантавирус инфекцияси тарқалаётгани ҳақида турли хабарлар кенг муҳокама қилинмоқда. Шу муносабат билан Санитария-эпидемиологик осойишталик ва жамоат саломатлиги қўмитаси мамлакатимиздаги эпидемиологик вазият юзасидан расмий маълумот берди.

Қўмита раисининг биринчи ўринбосари Нурмат Атабековнинг таъкидлашича, айни пайтда Ўзбекистонда хантавирус билан боғлиқ эпидемиологик вазият барқарор бўлиб, касалланиш ҳолатлари қайд этилмаган.

Қайд этилишича, Жаҳон соғлиқни сақлаш ташкилоти маълумотларига кўра, хантавирус коронавирус каби тез тарқалиш хусусиятига эга эмас ҳамда глобал пандемияга сабаб бўлмайди.

Мутахассисларнинг маълум қилишича, хантавируснинг 20 дан ортиқ тури мавжуд бўлиб, улардан фақат айримлари инсонларда касаллик келтириб чиқариши мумкин. Инфекция асосан кемирувчилар орқали юқади. Вирус зарарланган чанг, озиқ-овқат маҳсулотлари ёки кемирувчилар ажратмалари орқали инсон организмига тушиши мумкин.

Касаллик кўпинча тана ҳароратининг кўтарилиши, бош оғриғи, ҳолсизлик, кўнгил айниши, қусиш, мушак ва қорин соҳасидаги оғриқлар билан намоён бўлади. Оғир ҳолатларда эса буйрак етишмовчилиги ҳамда юрак-қон томир ва нафас олиш тизими билан боғлиқ асоратлар кузатилиши мумкин.

Ҳозирги кунда хантавирусга қарши махсус вакцина ёки аниқ даволаш протоколи мавжуд эмас. Шу боис мутахассислар профилактик чораларга қатъий амал қилиш муҳимлигини таъкидламоқда.

Фуқароларга шахсий гигиена қоидаларига риоя қилиш, яшаш ва иш жойларини озода сақлаш, озиқ-овқат маҳсулотларини хавфсиз шароитда сақлаш, мева-сабзавотларни яхшилаб ювиш ҳамда ёпиқ хоналарни мунтазам шамоллатиб туриш тавсия этилди.

Шунингдек, мамлакатимизда эпидемиологик вазиятни барқарор сақлаш ва четдан кириб келиши мумкин бўлган касалликларнинг олдини олиш мақсадида 53 та чегара пунктида доимий санитария назорати йўлга қўйилгани маълум қилинди.