Россия Ўзбекистондан асалариларни олиб кетаётган юк машиналарининг “йўқолгани” ҳақидаги хабарларни рад этди
Ўзбекистондан келтирилган асаларилар импортига рухсат берилмаган ва юклар қайта экспорт қилинган.
Россия Урал божхона бошқармаси Ўзбекистондан олиб кетилаётган асаларилар ортилган иккита юк машинаси бедарак йўқолгани ҳақидаги хабарларни рад этди. Бу ҳақда ТАСС агентлиги божхона маълумотига таяниб хабар берди.
Қайд этилишича, аввалроқ айрим оммавий ахборот воситаларида Ўзбекистондан олиб чиқилган асаларилар юкланган транспорт воситалари Россия чегарасини кесиб ўтгач, карантин ҳудудига етиб бормасдан Челябинск вилоятида “ғойиб бўлгани” ҳақида хабарлар тарқалган эди.
Урал божхона бошқармаси матбуот хизмати ушбу маълумотларни инкор қилиб, “хавфли асалариларни ташиётган юк машиналарининг йўқолгани ҳақидаги хабарлар ҳақиқатга тўғри келмайди”, дея баёнот берди.
Расмий маълумотга кўра, асаларичилик компанияси 2026 йил апрель ойида Челябинск вилоятидаги «Бугристое» назорат-ўтказиш пункти орқали Евроосиё иқтисодий иттифоқи ҳудудига асалари пакетларини олиб киришга уринган.
Ҳужжатлар текширилгач, Росселхознадзор томонидан Ўзбекистондан асаларилар импорти тақиқланган. Шундан сўнг юкларга нисбатан қайта экспорт тартиби қўлланилиб, жараён 2 май куни якунланган.
Божхона идорасига кўра, барча протседуралар амалдаги тартиб асосида амалга оширилган.
