Соҳада 5 йиллик меҳнат стажига эга аёллар ОТМга тавсиянома асосида қабул қилинади
Тавсиянома 3 йил давомида амал қилади.
Ўзбекистонда меҳнат тажрибасига эга хотин-қизларнинг олий таълим олиш имкониятларини кенгайтиришга қаратилган янги дастур ишга туширилди. Эндиликда мутахассислиги бўйича камида 5 йиллик меҳнат стажига эга, бироқ олий маълумот олмаган аёллар давлат олий таълим муассасаларига кириш учун тавсиянома олишлари мумкин.
Мазкур ташаббус Оила ва хотин-қизлар қўмитаси томонидан амалга оширилмоқда. Дастур доирасида давлат ОТМларига кириш учун хотин-қизларга алоҳида 500 та квота ажратилган.
Тавсиянома олиш учун номзодлар ўрта махсус ёки касб-ҳунар таълими дипломига эга бўлиши, мутахассислиги бўйича камида 5 йил ишлаган бўлиши ҳамда бакалавр даражасидаги олий маълумотга эга бўлмаслиги лозим.
Танлов кириш имтиҳонлари натижалари асосида амалга оширилади. Энг юқори балл тўплаган 500 нафар хотин-қиз талабаликка тавсия этилади.
Тавсиянома 3 йил муддат давомида амал қилади ва ундан фақат бир марта фойдаланиш мумкин. Дастур хорижий, нодавлат ҳамда ҳарбий олий таълим муассасаларига татбиқ этилмайди.
Аризаларни my.gov.uz портали орқали онлайн топшириш мумкин. Ҳужжатлар жорий йилнинг 1 июнига қадар қабул қилинади.
