Болалар омбудсмани фаолиятига тўсқинлик қилганлик учун маъмурий жавобгарлик жорий этилмоқда

 

Олий Мажлис Қонунчилик палатасининг навбатдаги ялпи мажлисида “Ўзбекистон Республикаси Олий Мажлисининг Бола ҳуқуқлари бўйича вакили (Болалар омбудсмани) тўғрисида”ги қонун муносабати билан айрим қонун ҳужжатларига қўшимча ва ўзгартиришлар киритишни назарда тутувчи қонун лойиҳаси кўриб чиқилди.

Қайд этилишича, мазкур лойиҳа орқали 13 та қонун ҳужжатига тегишли ўзгартириш ва қўшимчалар киритилиши белгиланган бўлиб, улар Болалар омбудсмани институтининг ҳуқуқий мақоми ва ваколатларини янада кучайтиришга қаратилган.

Хусусан, янги тартибларга кўра, ҳуқуқни муҳофаза қилувчи органлар томонидан болаларга қарши содир этилган жиноятлар юзасидан Бола ҳуқуқлари бўйича вакилни мажбурий равишда хабардор қилиш тартиби жорий этилади. Шунингдек, Болалар омбудсманига бундай жиноятлар бўйича иш материаллари билан танишиш ҳуқуқи берилади.

Қонун лойиҳасида озодликдан маҳрум этилган вояга етмаганлар, қамоққа олинган ва ушлаб турилган шахсларнинг мурожаатларини Бола ҳуқуқлари бўйича вакилга юбориш тартиби ҳам аниқ белгилаб қўйилмоқда.

Бундан ташқари, “Давлат божи тўғрисида”ги қонунга киритилаётган ўзгартиришларга мувофиқ, Болалар омбудсмани бола манфаатлари юзасидан судларга мурожаат қилганда давлат божини тўлашдан озод этилади.

Ҳужжатда, шунингдек, парламент палаталари томонидан Бола ҳуқуқлари бўйича вакилнинг дахлсизлик ҳуқуқига оид масалаларни кўриб чиқиш ҳамда унинг маърузасини эшитиш тартиблари ҳам мустаҳкамланмоқда.

Шу билан бирга, Бола ҳуқуқлари бўйича вакилнинг қонуний фаолиятига тўсқинлик қилганлик учун маъмурий жавобгарликни назарда тутувчи алоҳида нормалар ҳам жорий этилмоқда.

Таъкидланишича, ушбу қонун лойиҳаси Болалар омбудсмани фаолиятининг институционал мустақиллигини кучайтириш, бола ҳуқуқларига оид қонунчилик ижроси устидан парламент назоратини янада самарали ташкил этишга хизмат қилади.

Йиғилиш якунида қонун лойиҳаси депутатлар томонидан иккинчи ўқишда қабул қилинди.