Ангренда икки киши зиплайнда тўқнашиб кетди
Мазкур аттракцион тегишли давлат идораларининг рухсатига эга бўлмаган.
Ижтимоий тармоқларда Тошкент вилояти Ангрен шаҳридаги тоғли ҳудудда зиплайнда икки фуқаронинг тўқнашуви акс этган видео тарқалди. Ҳодиса юзасидан Фавқулодда вазиятлар вазирлиги маълумот берди.
Қайд этилишича, тросли тушиш мосламасидан фойдаланган фуқаролар тўқнашув оқибатида тан жароҳати олмаган.
Текширув давомида мазкур аттракцион тегишли давлат идораларининг рухсат берувчи ҳужжатларисиз ноқонуний фаолият юритиб келгани аниқланган.
Ҳодиса жойига Фавқулодда вазиятлар вазирлиги ходимлари ҳамда бошқа масъул идоралар вакиллари етиб борган. Ишчи гуруҳ хулосасига кўра, зиплайн аттракциони демонтаж қилиниб, унинг фаолиятини ташкил этган фуқароларга нисбатан жарима қўлланган.
ФВВ фуқароларни тегишли давлат органларидан расмий рухсат олмаган аттракционлардан фойдаланмасликка чақирди.
