Тошкентда автобус ва Tracker тўқнашиши оқибатида 3 киши жароҳатланди
Ҳодисага Tracker ҳайдовчисининг кескин бурилиши сабаб бўлган.
Тошкент шаҳрида 2026 йил 14 май куни соат 08:20 атрофида Yutong русумли автобус ва Tracker русумли транспорт воситаси иштирокида йўл-транспорт ҳодисаси содир бўлди. Бу ҳақда “Тошшаҳартрансхизмат” хабар берди.
Маълум қилинишича, “7-Автобус саройи” филиали тасарруфидаги, 69-сонли йўналишда ҳаракатланаётган Yutong автобуси Яккасарой тумани Шота Руставели кўчаси бўйлаб “БРТ” махсус ҳаракат тасмасида ҳаракатланиб келган.
Автобус Шота Руставели ва Яккасарой кўчалари кесишмасига яқинлашган вақтда Tracker русумли автомобиль ҳайдовчиси кескин чапга бурилган. Натижада транспорт воситалари тўқнашуви юз берган.
ЙТҲ оқибатида автобус йўловчиси, Tracker ҳайдовчиси ҳамда унинг йўловчиси тан жароҳати олиб, тиббий ёрдам учун 16-сонли Республика шошилинч тиббий ёрдам клиник илмий марказига мурожаат қилган.
Дастлабки маълумотларга кўра, ҳодисада Tracker ҳайдовчисининг ҳаракати айбли деб топилган.
Йўл-транспорт ҳодисаси Тошкент шаҳар ИИББ Йўл ҳаракати хавфсизлиги бошқармаси томонидан белгиланган тартибда расмийлаштирилган.
Мутасаддилар ҳайдовчилардан йўл ҳаракати қоидаларига қатъий риоя қилиш ва ҳаракат давомида эҳтиёткорликни оширишни сўраган.
