Саида Мирзиёева Бухородаги боғча ва поликлиникаларни кўздан кечирди
Бухорода ўтган асрда очилган боғча қайта қурилиб, икки йил ичида 36 та поликлиника реконструкция қилинади.
Саида Мирзиёева Бухородаги боғча ва поликлиникаларини бориб кўрди.
Президент администрацияси раҳбарининг билдиришича, Бухорода кўздан кечирилган боғча ва поликлиникаларнинг аҳволи ниҳоятда ачинарли бўлиб, уларни зудлик билан таъмирлаш талаб этилади.
“Бу болаларимизнинг келажаги учун зарур. 1977 йилда очилган 21-сонли болалар боғчаси қайтадан қурилади, 46 минг нафар одамга хизмат кўрсатадиган 9-сонли поликлиника учун эса янги бино барпо этилади”, деди Саида Мирзиёева.
Маълум қилинишича, ҳозирда мазкур муассаса 1972 йилда қурилган, тиббий стандартларга жавоб бермайдиган бинода – кам таъминланган фуқаролар учун мўлжалланган ётоқхонада жойлашган. Ушбу бино ҳам тўлиқ таъмирланади ва у ерда яшовчиларнинг шароитлари яхшиланади.
Бундан ташқари, икки йил ичида вилоятнинг чекка туманларида жойлашган яна 36 та поликлиникани реконструкция қилиш кўзда тутилган.
