АҚШ ва Исроил Эронга қарши янги зарбаларни бошлаши мумкин — NYT
АҚШ ҳарбийлари сулҳдан кейин тўхтатилган “Эпик Ғазаб” операциясини қайта тиклаш режасини тайёрламоқда.
АҚШ президенти Доналд Трамп Эронга нисбатан янги ҳарбий операцияларни бошлаш эҳтимолини кўриб чиқмоқда. Бу ҳақда The New York Times нашрига таяниб, NDTV World хабар берди.
Маълум қилинишича, Трамп Хитой сафаридан қайтгач, Оқ уй ва Пентагон дипломатик музокаралардаги боши берк вазиятни ҳарбий йўл билан ҳал қилиш вариантлари устида ишлашни кучайтирган. Хусусан, АҚШ ҳарбийлари ўтган ойги сулҳдан кейин тўхтатилган “Эпик Ғазаб” операциясини қайта тиклаш режасини тайёрламоқда.
Манбаларга кўра, АҚШ ва Исроил кучлари сулҳдан буён энг йирик қўшма тайёргарлик машғулотларини олиб бормоқда. Эҳтимолий зарбалар келаси ҳафтадаёқ бошланиши мумкинлиги айтилмоқда.
Айни пайтда халқаро воситачилар стратегик аҳамиятга эга Ҳормуз бўғозини қайта очиш бўйича муроса излаётган бўлса-да, Трамп Эроннинг навбатдаги тинчлик таклифини рад этган.
“Мен ҳужжатга қарадим. Агар биринчи жумласи ёқмаса, уни шунчаки ташлаб юбораман”, деган Трамп Пекиндан қайтаётиб Air Force One бортида журналистларга.
АҚШ президенти Хитой раиси Си Цзиньпин билан музокараларда Эрон масаласи ҳам муҳокама қилинганини тасдиқлаган. Трампнинг айтишича, Вашингтон ва Пекин “Эрон ядровий қуролга эга бўлолмайди” деган масалада умумий позицияга эга.
Шунингдек, Трамп Си Цзиньпин Ҳормуз бўғозининг очилишини қўллаб-қувватлашини билдирганини айтган. Унинг таъкидлашича, Эрон сўнгги икки ярим ҳафта давомида бўғоз орқали деярли савдо амалга оширмаган ва бу кунига тахминан 500 миллион долларлик йўқотишга тенг.
Reuters хабарига кўра, музокараларда Тайван масаласи ҳам асосий мавзулардан бири бўлган. Си Цзиньпин Трампни Тайван юзасидан кескинлик АҚШ ва Хитой ўртасида тўқнашувга олиб келиши мумкинлиги ҳақида огоҳлантирган.
