Самарқанд–Бухоро йўлида юк машиналари иштирокида ЙТҲ содир бўлди
Ҳодисага ҳайдовчининг ухлаб қолгани сабаб бўлган. Унинг бошқарувидаги автомобиль 2 та юк машинасига кетма-кет урилган.
Самарқанд вилоятининг Пахтачи туманида “ФАВ” ва “Sinoturk Howo” русумли юк автомобиллари иштирокида йўл-транспорт ҳодисаси юз берди. Бу ҳақда вилоят ЙҲХБ маълум қилди.
Маълумотларга кўра, ҳодиса 16 май куни соат 04:30 атрофида “Болтали” МФЙ ҳудудидан ўтувчи М-37 “Самарқанд–Бухоро–Туркманбоши” автомобиль йўлининг 118-километрида содир бўлган.
Маълумотларга кўра, “ФАВ” русумли автомобиль ҳайдовчиси Самарқанд–Навоий йўналишида ҳаракатланаётиб ухлаб қолган ва руль бошқарувини йўқотган. Оқибатда автомобиль йўл четида тўхтаб турган “Sinoturk Howo” юк машинасининг чап томонига урилган.
Шундан сўнг транспорт воситаси ҳаракатни тўхтата олмай, олдинда тўхтаб турган яна бир “Sinoturk Howo” юк автомобилининг орқа қисмига келиб урилган.
ЙТҲ оқибатида “ФАВ” ҳамда юк автомобилларидан бирида ёнғин юзага келган. Ёнғин Фавқулодда вазиятлар бошқармаси ходимлари томонидан қисқа муддатда бартараф этилган.
Ҳодиса натижасида тан жароҳати олганлар ва ҳалок бўлганлар қайд этилмаган.
Мазкур ҳолат юзасидан Пахтачи тумани ИИБ ЖХХ ЙҲХГ томонидан дастлабки суриштирув ишлари олиб борилмоқда.
Мутасаддилар ҳайдовчилардан чарчоқ аломатлари сезилганда транспорт бошқармаслик ва йўл ҳаракати қоидаларига қатъий риоя қилишни сўради.
