Самарқандда учта юк автомобили иштирокида ЙТҲ содир бўлди
Ҳодисага ҳайдовчининг рулда ухлаб қолиши сабаб бўлган.
Самарқанд вилояти Пахтачи туманида юк автомобиллари иштирокида йўл-транспорт ҳодисаси содир бўлди. Вилоят ЙҲХБ маълумотига кўра, ҳодиса 16 май куни соат 04:30 ларда М-37 “Самарқанд–Бухоро–Туркманбоши” автомобиль йўлининг 118-километрида юз берган.
Дастлабки маълумотларга кўра, “FAV” русумли юк автомобили ҳайдовчиси Самарқанд–Навоий йўналишида ҳаракатланаётиб ухлаб қолган ва рул бошқарувини йўқотган. Натижада автомобиль йўл четида тўхтаб турган “SINOTRUK HOWO” юк машинасининг чап ён қисмига урилган.
Шундан сўнг транспорт воситаси ҳаракатни тўхтата олмасдан, олдинда тўхтаб турган яна бир “SINOTRUK HOWO” русумли юк автомобилнинг орқа қисмига келиб урилган.
Ҳодиса оқибатида “FAV” ҳамда “SINOTRUK HOWO” русумли юк транспорт воситаларида ёнғин юзага келган. Ёнғин Фавқулодда вазиятлар вазирлиги ходимлари томонидан тезкор равишда бартараф этилган.
Маълум қилинишича, йўл-транспорт ҳодисаси оқибатида тан жароҳати олганлар ва ҳалок бўлганлар йўқ.
Мазкур ҳолат юзасидан Пахтачи тумани ИИБ ЖХХ ЙҲХГ томонидан дастлабки суриштирув ишлари олиб борилмоқда.
