Элдор Шомуродов Туркия Суперлигасида энг кўп гол урган футболчи бўлди
Футболчи мавсум давомида 22 та гол уриб, 5 та голли узатмани амалга оширган.
Ўзбекистон миллий терма жамоаси ҳужумчиси Элдор Шомуродов Истанбул Башакшеҳир клуби сафида мавсум давомида 22 та гол уриб, 5 та голли узатмани амалга оширган.
Натижаларга кўра, у Туркия Суперлигасида тўпурарлар пойгасида биринчи ўринни эгаллади. Шомуродов мавсум якунида махсус мукофот ва рамзий карточка билан тақдирланди.
Иккинчи ўринни Пол Онуачу эгаллаган. У ҳам 22 та гол урган бўлсада, голларнинг бир қисми пенальтилардан бўлгани сабабли рейтингда иккинчи поғонада қайд этилган.
Учинчи ўринда эса Андерсон Талиска (Фенербаҳче) 19 та гол ва 4 та голли узатма билан мавсумни якунлаган. Виктор Осимҳен ҳамда бошқа етакчи ҳужумчилар 15 тадан гол билан кучли бешликдан жой олган.
Элдор Шомуродов 2025 йил ёзида Италиянинг Рома клубидан Истанбул Башакшеҳир сафига ўтганди.
Шомуродов 2021 йил ёзида «Рома»га трансфер қилинган. У пойтахт клуби сафида жами 85 та учрашувда майдонга тушиб, 13 та гол муаллифига айланган. 2023 йил январ ойида у Специя клубига ижара асосида ўтган ва мавсумни шу жамоада якунлаган. 2023/24 йилги мавсумда эса Клаудио Ранери бошқарувидаги Каляри сафида ижара асосида ўйнаган.
2025 йил якунларига кўра, Элдор Шомуродов Ўзбекистонда “Йилнинг энг яхши футболчиси” деб топилганди.
