Фарғонада ўсмир болалардан иборат жиноий гуруҳ қўлга олинди
Улар мактаб ўқувчилари ва фуқароларни қўрқитиш, таҳдид қилиш орқали талончилик қилиб келган.
Фарғона вилоятида мактаб ўқувчилари ва фуқароларни қўрқитиб келган уюшган жиноий гуруҳ фаолиятига чек қўйилди. Бу ҳақда Фарғона вилояти Ички ишлар бошқармаси маълум қилди.
Қайд этилишича, жиноий гуруҳ таркибида 15, 18 ва 20 ёшли шахслар бўлган. Дастлабки маълумотларга кўра, муқаддам Жиноят кодексининг 97-моддаси — қасддан одам ўлдириш жинояти билан судланган, 2004 йилда туғилган шахс гуруҳ етакчиси сифатида бошқа шахсларни атрофига жамлаган.
Маълум қилинишича, гуруҳ аъзолари Қиргули даҳаси ҳудудида мактаб ўқувчилари ҳамда фуқароларни қўрқитиш, тан жароҳати етказиш билан таҳдид қилиш орқали телефон аппаратлари ва бошқа моддий қийматликларни ўғрилик, фирибгарлик ҳамда талончилик йўли билан қўлга киритиб келган.
Шунингдек, мазкур жиноий тўда сафига бошқа ёшларни жалб қилишга мунтазам уринишлар бўлгани ҳам қайд этилган.
Давлат хавфсизлик хизмати ҳамда ички ишлар органлари ходимлари ҳамкорлигида ўтказилган тезкор тадбирлар давомида гуруҳнинг ноқонуний фаолиятига чек қўйилган.
Ҳозирда жиноий гуруҳнинг барча аъзолари Жиноят-процессуал кодексининг 224-моддаси тартибида вақтинча сақлаш ҳибсхонасига жойлаштирилган.
Тезкор тадбирлар давомида гумонланувчилардан уяли алоқа воситалари, «гашиш» гиёҳвандлик моддаси ҳамда совуқ қурол ашёий далил сифатида олинган ва тегишли ҳужжатлар расмийлаштирилган.
Айни пайтда ҳолат юзасидан терговга қадар текширув ҳаракатлари олиб борилмоқда.
