Фарғонада бир гуруҳ аёллар норозилик билдириб, автомобиль йўлини тўсиб қўйди
Улар бозордаги жойлари олиб қўйилганидан норози савдогарлар бўлган.
Фарғона вилоятининг Қўштепа туманида бозор савдогарларининг жойлари тортиб олингани ҳақида ижтимоий тармоқларда хабарлар тарқалди. Мазкур ҳолат вилоят ИИБ томонидан ўрганилди.
Маълум қилинишича, Қумтепа маҳалласидаги бозор ҳудудида айрим савдогарлар автотураргоҳда савдо қилиб, йўловчи ташувчи транспортлар ҳаракати ва фуқаролар ўтиш йўлакларини тўсиб қўйган.
Шу сабабли туман ҳокимлиги ва бозор маъмурияти томонидан уларга бозорнинг ички қисмида савдо қилиш таклиф қилиниб, бир неча бор огоҳлантирилган.
Бироқ савдогарлар белгиланган тартибга зид равишда савдони давом эттиргани айтилмоқда.
14 май куни автотураргоҳ ҳудудида савдо қилиш тақиқланганидан сўнг, бир неча аёл жамоат тартибини бузиб, йўл ҳаракатини тўсишга уринган. Ҳодиса жойига етиб келган ички ишлар органлари ходимлари томонидан вазият бартараф этилган ва иштирокчилар билан профилактик тушунтириш ишлари олиб борилган.
Қайд этилишича, жамоат тартибини бузишга даъват қилган ва ҳуқуқни муҳофаза қилувчи орган ходимларининг қонуний талабларига бўйсунмаган 5 нафар фуқаро Ўзбекистон Республикаси Маъмурий жавобгарлик тўғрисидаги кодекснинг 195 ва 201-моддалари асосида жавобгарликка тортилган. Суд томонидан уларга жарима жазоси тайинланган.
