Қозоғистонда Марказий Осиёдаги илк учувчи такси синовдан ўтказилди

 

Қозоғистонда eVTOL туридаги ҳаво таксиси прототипининг илк намойиш парвози Олмаота вилоятидаги Байсерке қишлоғи яқинида жойлашган Алатау шаҳрида бўлиб ўтди. Бу ҳақда kz.kursiv нашри хабар берди.

 

Лойиҳа Алатау Advance Air Group Ltd. компанияси томонидан амалга оширилмоқда. Компания Алатау ҳудудида шаҳар ҳаво ҳаракатчанлиги тизимини ривожлантиришни мақсад қилган.

Намойиш доирасида Хитойнинг Шанхай шаҳридаги AutoFlight компанияси томонидан ишлаб чиқарилган eVTOL қурилмаси синовдан ўтказилган. eVTOL — вертикал учиш ва қўнишга қодир электр самолёт бўлиб, дрон, вертолёт ва анъанавий самолёт технологияларини бирлаштиради. Ушбу транспорт тури ҳаво таксиси, шаҳар транспорти ҳамда юк ташиш хизматлари учун мўлжалланган.

 

                                       

 

Алатауда намойиш этилган AutoFlight Prosperity модели соатига 200 километргача тезликка эриша олади ва 200 километргача масофани босиб ўтишга қодир. Қурилма учувчи билан бирга беш нафар йўловчини ташиши мумкин. Шунингдек, унинг юк кўтариш қуввати 2,4 тоннани ташкил этади.

Самолётнинг қанотлари узунлиги 15 метр, корпусининг узунлиги эса 11 метрни ташкил қилади. Қурилма 13 та электр двигатель ва паррак билан жиҳозланган.

 

                                           

 

Лойиҳа доирасида Алатау ҳудудида махсус учириш майдончаси ҳам қурилган. Ҳозирда у синов маркази сифатида фойдаланилмоқда. Келгусида мазкур ҳудудда йўловчилар учун терминал — вертипорт қурилиши режалаштирилган. Унда чипталарни харид қилиш, рўйхатдан ўтиш, хавфсизлик назоратидан ўтиш ва парвоз олдидан кутиш зоналари ташкил этилади.

 

Маълум қилинишича, AutoFlight Prosperity модели ҳозирда сертификатлаш босқичида бўлиб, 2027 йилга қадар парвоз сертификатини олиши кутилмоқда.

Келажакда бундай ҳаво таксилари Алатау, Олмаота ва унга туташ ҳудудлар ўртасида йўловчи ташиш хизматларида фойдаланилиши мумкин.