Таиландда 30 долларлик чиқиш йиғими жорий этилиши мумкин: у туристлар ва фуқаролардан олинади
Йиғим фақат мамлакатдан ҳаво транспортида чиқишда ундирилади, қуруқлик ва денгиз орқали чиқишда эса олинмайди.
Таиланд ҳукумати мамлакатдан самолётда чиқиб кетадиган шахслардан янги йиғим ундиришни таклиф қилмоқда. Ташаббус бўйича жамоатчилик муҳокамаси 29 октябргача давом этади.
Таклиф этилаётган тартибга кўра, чиқиш йиғими минг бат, яъни тахминан 30 долларни ташкил қилади. У хорижий сайёҳлар билан бирга Таиланд фуқароларидан ҳам ундирилади.
Йиғимни авиакомпаниялар ёки уларнинг агентлари авиачипта учун тўлов вақтида ундириши режалаштирилган. Қироллик оиласи аъзолари, патриарх, хорижий давлатлар раҳбарлари, ҳукуматнинг расмий меҳмонлари ҳамда икки ёшгача бўлган болаларни йиғимдан озод қилиш таклиф этилмоқда.
Мамлакатдан қуруқлик ёки денгиз орқали чиқиб кетувчилардан эса ушбу йиғим олинмайди.
Таиланд Молия вазирлиги янги йиғим ички туризмни ривожлантириш ва маблағларнинг мамлакат иқтисодиётида қолишига ёрдам беришини ҳисобламоқда. Бироқ Таиланд туристик агентликлари ассоциацияси ташаббусни танқид қилган.
Жамоатчилик муҳокамаси якунлангач, таклиф қонун сифатида қабул қилинса, у расман эълон қилинганидан 180 кун ўтиб кучга киради.
Шунингдек, Таиланд расмийлари хорижий сайёҳлар учун 450 бат (тахминан 13,5 доллар) миқдорида оширилган йиғим жорий этиш масаласини ҳам кўриб чиқмоқда. Мазкур чорани 2027 йилда қабул қилиш режалаштирилган.
