Қозоғистон 16 ёшгача бўлган болалар учун ижтимоий тармоқлар чекланади
Қозоғистон бу борада Австралия ва Европа давлатлари тажрибасини ўрганаётганини билдирган.
Қозоғистонда 16 ёшгача бўлган болаларнинг ижтимоий тармоқлардан фойдаланишини чеклаш масаласи муҳокама қилинмоқда. Бу ҳақда Tengrinews.kz нашри хабар берди.
Маълум қилинишича, мамлакат Маданият ва ахборот вазирлиги томонидан тегишли қонунчиликка ўзгартиришлар киритишни назарда тутувчи ҳужжатлар пакети ишлаб чиқилган. Унда вояга етмаганларнинг онлайн платформаларда рўйхатдан ўтишини чекловчи нормалар ҳам мавжуд.
Маданият ва ахборот вазири ўринбосари Евгений Кочетовнинг айтишича, ҳозирча мазкур чекловни амалга ошириш механизмлари якуний шакллантирилмаган. Ҳужжат айни пайтда давлат идоралари билан мувофиқлаштирилмоқда ва ҳали парламент муҳокамасига киритилмаган.
Расмийга кўра, чекловлар асосан 16 ёшгача бўлган янги фойдаланувчиларнинг ижтимоий тармоқларда аккаунт очишига тааллуқли бўлиши мумкин. Шу билан бирга, мавжуд аккаунтларга қандай тартиб қўлланиши масаласи ҳали муҳокама қилинмоқда.
Кочетов бу ташаббусни “глобал тренд” деб атаб, Австралия ижтимоий тармоқлар бўйича ёш чекловларини жорий этган илк давлатлардан бири бўлганини эслатган. Шунингдек, бир қатор Европа давлатлари ҳам шу йўналишда қонунчиликни қайта кўриб чиқаётгани таъкидланган.
Расмийларнинг билдиришича, Қозоғистон бошқа давлатлар тажрибасини, жумладан ёшни аниқлаш ва фойдаланувчиларни текшириш тизимларини ҳам ўрганмоқда. Якуний қонун лойиҳаси янги парламент — Қурултой томонидан кўриб чиқилиши кутилмоқда.
