Қурбон ҳайити арафасида 8 мингдан ортиқ болага 200 доллардан маблағ ажратилади

Шавкат Мирзиёев Қурбон ҳайити муносабати билан эҳтиёжманд аҳолини ижтимоий-иқтисодий жиҳатдан қўллаб-қувватлашга доир таклифлар тақдимоти билан танишди. Бу ҳақда Президент матбуот хизмати хабар берди.

 

Маълум қилинишича, тақдимотда Ўзбекистон мусулмонлари идораси, Ижтимоий ҳимоя миллий агентлиги, Соғлиқни сақлаш вазирлиги, Иқтисодиёт ва молия вазирлиги, Ўзбекистон маҳаллалари уюшмаси ҳамда Вақф хайрия жамоат фонди томонидан ишлаб чиқилган таклифлар кўриб чиқилди.

 

Унга кўра, Қурбон ҳайити арафасида кенг кўламли ижтимоий тадбирлар амалга оширилади. Жумладан, 10 минг нафар оғир ва ногиронликка олиб келувчи касалликларга чалинган болаларда жарроҳлик амалиётлари ўтказиш, 2,3 минг нафар онкологик ва гематологик беморларни текширув ҳамда даволашдан ўтказиш, камида 350 нафар беморда жигар ва буйрак трансплантацияси харажатларини қоплаш режалаштирилган.

 

Шунингдек, 8 мингдан ортиқ етим ва ота-она қарамоғидан маҳрум бўлган болалар ҳамда Ватан ҳимоясида ҳалок бўлганларнинг фарзандлари учун омонат ҳисобварақларига 200 АҚШ доллари миқдорида маблағ ўтказилиши кўзда тутилган.

 

Бундан ташқари, 500 та масжидда таҳоратхоналарни қуриш ёки таъмирлаш, қабристонларни ободонлаштириш, ижтимоий ҳимояга муҳтож оилаларни озиқ-овқат маҳсулотлари билан таъминлаш ҳам режалаштирилган.

 

Мазкур тадбирлар 690 миллиард сўм маблағ ҳисобидан молиялаштирилиши белгиланган. Президент мутасаддиларга барча ишларни шаффоф ва манзилли ташкил этиш бўйича топшириқлар берди.