Ёзги таътилда ўқувчилар назорати юзасидан кафолат хати олинаётгани рад этилди
Мактабгача ва мактаб таълими вазирлиги бу мазмунда ҳеч қандай кўрсатма ёки тавсия берилмаганини маълум қилди.
Ижтимоий тармоқларда умумтаълим мактаблари синф раҳбарларидан ўқувчиларни ёзги таътил даврида назорат қилиб бориш ҳамда ота-оналар билан ҳамкорлик қилиш бўйича кафолат хати талаб қилинаётгани ҳақида хабарлар тарқалди.
Мактабгача ва мактаб таълими вазирлиги ахборот хизмати раҳбари мазкур ҳолат юзасидан расмий муносабат билдириб, ҳудудий бўлинмалар ва таълим муассасаларига бу мазмунда ҳеч қандай кўрсатма ёки тавсия берилмаганини маълум қилди.
Ижтимоий тармоқларда тарқалган кафолат хати намунасида синф раҳбари ўзи раҳбарлик қилаётган ўқувчиларни қаттиқ назоратга олиши, ҳар хил ўтиришлар, пул йиғимлари қилишларига йўл қўймаслигини кафолатлаши кўрсатилган. Уларнинг ота-оналаридан кафолат хатлари олиши, таътил вақтида мунтазам алоқада бўлиб туриши, кафолат хатида қайд этилган ҳолатлар юзасидан ҳар куни мактаб директорига ва ММИБДЎга ахборот бериши келтирилган.
