Қамчиқ довонида сел сабаб ҳаракат вақтинча чекланди
Лой, тупроқ ва шағал аралаш сел йўлнинг қатнов қисмига тушган.
«Қамчиқавтойўл» ихтисослаштирилган йўллардан фойдаланиш корхонаси” давлат муассасасининг маълум қилишича, 22 май куни А-373 Тошкент–Оҳангарон–Ангрен–Қўқон–Шаҳрихон–Андижон автомобиль йўлининг 129,9-километр қисмида тоғ ён бағридан лой, тупроқ ва шағал аралаш сел сувлари йўлнинг қатнов қисмига тушган.
Юзага келган вазият сабаб Водий—Тошкент йўналишида автомобиллар ҳаракати хавфсизлик нуқтаи назаридан вақтинчалик бир тасмага йўналтирилган.
Муассаса ҳамда Фавқулодда вазиятлар вазирлиги маълумотига кўра, ҳозирда ҳудудда тегишли ташкилотлар мутахассислари томонидан сел оқибатларини бартараф этиш ишлари олиб борилмоқда.
Қайд этилишича, автомобиллар ҳаракати назорат остида давом эттирилмоқда. Ҳайдовчилардан эҳтиёткор бўлиш, белгиланган хавфсизлик қоидаларига қатъий амал қилиш сўралган.
