Фан клублари терма жамоанинг ўн иккинчи ўйинчиси — Шавкат Мирзиёев
Президент “Бунёдкор” стадионида бўлиб ўтаётган футбол бўйича миллий терма жамоани жаҳон чемпионатига кузатиш маросимида нутқ сўзлади.
Президент Шавкат Мирзиёев Тошкентдаги “Бунёдкор” стадионида футбол бўйича Ўзбекистон миллий терма жамоасини жаҳон чемпионатига кузатиш маросимида иштирок этиб, спортчилар ҳамда мухлисларга мурожаат қилди.
Давлат раҳбари АҚШ, Мексика ва Канада мезбонлик қиладиган футбол бўйича жаҳон чемпионати олдидан барчани катта футбол байрами билан табриклаб, ушбу кун ўзбек футболи тарихидаги муҳим саҳифа эканини таъкидлади.
Президент миллий терма жамоанинг тарихий натижасини эътироф этиб, футболчилар, уларнинг ота-оналари, устоз ва мураббийлари ҳамда жамоанинг барча аъзоларига миннатдорлик билдирди.
Шавкат Мирзиёев мухлисларнинг жамоага бўлган садоқати ва қўллаб-қувватловини алоҳида қайд этиб, уларни ҳақиқий ватанпарварлик намунаси деб атади.
“Сизларнинг миллий жамоага бўлган меҳр ва садоқатингиз ҳар қанча таҳсинга лойиқ”, — деди давлат раҳбари.
Президент стадиондаги фан-клублар фаолиятига ҳам тўхталиб, улар ҳар бир учрашувда “ўн иккинчи ўйинчи” вазифасини бажараётганини таъкидлади.
“Фан-клублар аъзолари ҳар бир ўйинда чин ўзбекона, бетакрор услуби билан ўн иккинчи ўйинчи вазифасини муносиб бажармоқда. Ишончим комил, улар мундиалда ҳам минглаб юртдошларимиз, хориждаги ватандошларимиз билан бирга худди ҳозиргидек ғайрат-шижоат ва ҳайқириқлар билан футболчиларимизни қўллаб-қувватлашади”, — деди Шавкат Мирзиёев.
Давлат раҳбари футбол Ўзбекистонда аллақачон ҳар бир оиланинг дўстига айланганини қайд этиб, стадионга фарзандлари ва набиралари билан келаётган мухлислар сони ортиб бораётганини мисол келтирди. Президент ёш авлод спортчиларнинг ютуқларидан руҳланиб, келажакда янги чемпионлар етишиб чиқишига ишонч билдирди.
Нутқ давомида мамлакатда спорт инфратузилмасини ривожлантириш бўйича амалга оширилаётган лойиҳалар ҳақида ҳам маълумот берилди.
Қайд этилишича, ўтган йили Тошкентда 100 гектардан ортиқ ҳудудда бешта йирик спорт мажмуасини ўз ичига олган замонавий Олимпия шаҳарчаси фойдаланишга топширилган.
Шунингдек, Янги Тошкент ҳудудида FIFA стандартларига тўлиқ жавоб берадиган, 55 минг томошабинга мўлжалланган янги стадион қурилиши давом этмоқда.
Президентнинг таъкидлашича, ушбу арена миллионлаб футбол мухлислари учун катта совға бўлади ҳамда Ўзбекистонда нуфузли халқаро спорт мусобақаларини ўтказиш имкониятларини кенгайтиради.
