“Футболчиларимизни замонамиз қаҳрамонлари десак арзийди” — Шавкат Мирзиёев

Президент Шавкат Мирзиёев футбол бўйича Ўзбекистон миллий терма жамоаси билан учрашув ўтказди ҳамда жамоанинг жаҳон чемпионатига йўлланма олишини тарихий воқеа сифатида баҳолади.

 

Давлат раҳбари АҚШ, Мексика ва Канада майдонларида бўлиб ўтадиган футбол бўйича жаҳон чемпионати олдидан футболчилар ва мухлисларни табриклаб, халқ бу кунларни 34 йил кутганини таъкидлади.

 

Президент сўзларига кўра, футболчилар ҳар бир учрашувга юқори тайёргарлик ва катта масъулият билан ёндашиб, майдонга фақат ғалаба учун тушган.

 

“Футболчиларимизни Ўзбекистон тарихида янги саҳифа очган замонамиз қаҳрамонлари деб айтсак арзийди”, — деди давлат раҳбари.

 

Шунингдек, Шавкат Мирзиёев мундиал йўлланмаси қўлга киритилган куни қувончдан ухлай олмаганини айтиб, футболчилар, уларнинг ота-оналари, устозлари ва мураббийларига миннатдорлик билдирди.

 

Учрашувда таниқли шоир, ёзувчи ва санъаткорлар ҳам иштирок этгани қайд этилди. Президентнинг айтишича, улар футболчиларнинг жасорати ҳақида янги шеърлар, қўшиқлар ва асарлар яратмоқда.

 

Давлат раҳбари тадбиркорлар ҳам терма жамоа муваффақиятидан фаол фойдаланаётганини билдириб, бизнес вакиллари футбол орқали ўз миллий брендларини дунёга танитаётгани ва янги бозорларга чиқаётганини таъкидлади.

 

Президент футболчиларнинг ютуқлари ёшлар учун катта мотивация бўлаётганини ҳам қайд этди.

 

“Мен ҳам машҳур футболчи бўламан” деган болалар сафи кўпаймоқда. Халқимиз сизлар билан доим фахрланади”, — деди Шавкат Мирзиёев.