Тошкентда ЙТҲ оқибатида 26 ёшли йигит ҳалок бўлди
Nexia-3 катта тезликда келиб бетон устунга урилган. Йўловчи вафот этган, ҳайдовчига эса биринчи тиббий ёрдам кўрсатилган.
Тошкент шаҳрининг Сирғали туманида содир бўлган йўл-транспорт ҳодисаси оқибатида бир киши вафот этди. Бу ҳақда ИИББ ЙҲХБ хабар берди.
Маълум қилинишича, ҳодиса 22 май куни соат 13:00 лар атрофида Сергели тумани Файзли Тошкент кўчасидаги 60-уй қаршисида юз берган.
2001 йилда туғилган О.Б. бошқарувидаги Nexia-3 русумли автомобиль катта тезликда ҳаракатланаётиб, ҳайдовчи руль бошқарувини йўқотган ва йўл четидаги бетон устунга бориб урилган.
ЙТҲ оқибатида автомобиль йўловчиси — 2000 йилда туғилган И.Х. оғир тан жароҳатлари олиб, воқеа жойида вафот этган. Ҳайдовчига эса биринчи тиббий ёрдам кўрсатилган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.
Тошкент шаҳар ИИББ ЙҲХБ барча ҳайдовчи ва йўл ҳаракати қатнашчиларини йўл ҳаракати қоидаларига қатъий риоя қилишга чақирди ҳамда марҳумнинг яқинларига ҳамдардлик билдирди.
