Ўзбекистонда “Ҳар бир маҳалла — футбол майдони” дастури йўлга қўйилади
Дастур доирасида “Маҳалла лигаси” ташкил этилади. Унда 12–17 ёшли ўғил-қизлардан иборат маҳалла футбол жамоалари тузилади.
Президент Шавкат Мирзиёев Ўзбекистонда футболни ривожлантириш бўйича амалга оширилган ислоҳотлар натижасида ҳаваскор ва профессионал футболчилар сони кескин ошганини маълум қилди.
Давлат раҳбари футбол бўйича Ўзбекистон миллий терма жамоаси билан учрашувда спорт, хусусан футболга қаратилган эътибор ва яратилган инфратузилма бугунги ютуқларга мустаҳкам замин бўлганини таъкидлади.
Қайд этилишича, сўнгги йилларда ҳудудларда 200 дан ортиқ йирик спорт иншооти, қарийб 4 мингта хусусий спорт клуби фаолият бошлаган. Шунингдек, 1,5 мингдан зиёд маҳаллада спорт майдончалари барпо этилган.
Пойтахтда замонавий Олимпия шаҳарчаси қурилиб, Юқори Чирчиқ туманида “Миллий футбол маркази” ишга туширилган. Ҳар бир вилоятда профессионал футбол академияси ва футбол мактаблари ташкил этилган.
Президентнинг айтишича, амалга оширилган ишлар натижасида ҳаваскор футболчилар сони 5 миллион нафарга етган. Футбол билан мунтазам шуғулланувчилар сони 1 миллион 300 мингдан ошган бўлса, профессионал футболчилар сони 17 минг нафарга етган.
Давлат раҳбари футбол тизимида коррупция ва таниш-билишчиликка барҳам берилганини ҳам қайд этди.
“Энг асосийси, футболда коррупция ва таниш-билишчилик деган иллатларга барҳам берилди. Очиқ ва шаффоф тизим яратилди. Бу энг иқтидорли ёшларни, ростакам истеъдодларни катта майдонга олиб чиқди”, — деди Шавкат Мирзиёев.
Президент футбол нафақат профессионал спорт тури, балки ёшлар тарбияси, соғлом турмуш тарзи, интизом ва ватанпарварлик мактаби бўлишини таъкидлади.
Шу муносабат билан Ўзбекистонда “Ҳар бир маҳалла — футбол майдони” дастури бошланиши маълум қилинди. Унга кўра, дастур умуммиллий ҳаракатга айлантирилади ва ҳар бир маҳаллада болалар учун футбол билан шуғулланиш имкониятлари кенгайтирилади.
Дастур доирасида “Маҳалла лигаси” ташкил этилади. Унда 12–17 ёшли ўғил-қизлардан иборат маҳалла футбол жамоалари тузилади.
Ҳар йили ҳаваскор футболчилар ўртасида “маҳалла — туман — вилоят — республика” босқичларидан иборат мусобақалар ўтказилади.
Президентнинг таъкидлашича, “Маҳалла лигаси” профессионал футбол клублари учун иқтидорли ёшларни саралаб олишда муҳим база вазифасини бажаради.
