АҚШ Исроилни Эрон бўйича музокаралардан четлаштирди — NYT
Нашрга кўра, бу ҳолат сайловлар олдида турган Нетаняхуга сиёсий зарба бериши мумкин.
АҚШ маъмурияти Исроилни Эрон билан олиб борилаётган музокаралардан амалда четлаштирган. Бу ҳақда The New York Times Тел-Авивдаги амалдорларга таяниб хабар берди, дея ёзмоқда РИА Новости.
NYT маълумотларига кўра, Исроил расмийлари Вашингтон ва Теҳрон ўртасидаги музокаралар ҳақида етарли маълумот олмаяпти. Шу сабабли улар музокараларга оид тафсилотларни минтақадаги дипломатлар, сиёсий алоқалар ҳамда Эрон ичидаги кузатувлар орқали йиғишга мажбур бўлмоқда.
Америкалик амалдорларнинг айтишича, АҚШ президенти Доналд Трамп Исроил бош вазири Бенямин Нетаняхуни ҳарбий иттифоқчи сифатида кўрса-да, Эрон билан музокараларда яқин сиёсий ҳамкор деб ҳисобламайди. NYT'нинг ёзишича, Исроилнинг роли “тенг ҳуқуқли шерик” мақомидан иккинчи даражали иштирокчи даражасига тушиб қолган.
Газета бу ҳолат Нетаняху учун сиёсий жиҳатдан оғир зарба бўлиши мумкинлигини қайд этган. Чунки у жорий йилда мураккаб қайта сайлов кампаниясига тайёргарлик кўрмоқда.
Шу билан бирга, АҚШ Давлат департаменти июнь бошида Исроил ва Ливан ўртасида музокаралар ўтказилишини маълум қилган. Ўт очишни тўхтатиш режими сақланаётганига қарамай, Исроил армияси Ливан ҳудудига зарбалар беришда давом этмоқда. “Ҳизбуллоҳ” ҳаракати эса бунга жавобан чегара ҳудудидаги исроиллик ҳарбийларга ҳужум қилмоқда.
The Wall Street Journal'нинг ёзишича, Доналд Трамп Эронга қарши янги ҳарбий зарбаларни ҳозирча кечиктириб, дипломатик музокараларни давом эттиришни маъқул кўрган. Fars агентлиги эса Вашингтон можаро якунланиши учун Теҳронга бешта шарт қўйганини билдирган. Қайд этилишича, ушбу талаблар Эрон томонининг позициясига зид ҳисобланади.
