Трамп Эрон можароси сабаб ўғлининг тўйида қатнашмайди
АҚШ президенти Эрон бўйича кейинги қадамларни муҳокама қилиш учун Оқ уйда миллий хавфсизлик йиғилиши ўтказди.
АҚШ президенти Доналд Трамп Эрон билан боғлиқ вазият юзасидан кейинги қадамларни муҳокама қилиш мақсадида Оқ уйда миллий хавфсизлик бўйича юқори мартабали расмийлар билан учрашув ўтказди.
СNN маълумотига кўра, йиғилишда вице-президент Ж. Д. Венс, мудофаа вазири Пит Ҳегсет ҳамда бошқа хавфсизлик масъуллари иштирок этган.
Маълум қилинишича, учрашув Эрон билан можарони дипломатик йўл билан ҳал этиш бўйича давом этаётган музокаралар фонида бўлиб ўтган. Бироқ йиғилиш якунида аниқ қарор қабул қилинмаган.
СNN манбаларига кўра, музокаралар суръатидан норози бўлган Трампга ҳарбий ҳаракатларни қайта бошлаш бўйича бир нечта вариантлар тақдим этилган. АҚШ раҳбари аввалроқ Форс кўрфази давлатлари илтимоси билан эҳтимолий зарбаларни вақтинча ортга сургани ҳақида айтган эди.
Шунингдек, Трамп Нью-Жерсида режалаштирилган дам олиш сафари ва ўғлининг Багама оролларидаги тўйида иштирок этишни бекор қилган. У бу қарорини “ҳукумат ишлари ва Америка манфаатлари” билан изоҳлаган.
“Менимча, айнан шу муҳим пайтда Вашингтонда, Оқ уйда қолишим зарур”, — деб ёзган у Тruth Sосial тармоғида.
Айни пайтда АҚШнинг Эрон бўйича кейинги қадамлари қандай бўлиши ҳозирча номаълумлигича қолмоқда. Манбаларга кўра, Вашингтон дипломатик йўл билан келишувга эришиш имкониятини ҳам сақлаб қолмоқда.
