Қурбон ҳайити муносабати билан Тошкентдан ҳудудларга қўшимча авиақатновлар йўлга қўйилади
Ушбу рейслар орқали қарийб 9 минг нафарга яқин йўловчини ўз манзилига етказиш режалаштирилган.
Қурбон ҳайити байрами арафасида Тошкентдан Бухоро, Термиз, Урганч ва Нукус йўналишларида қўшимча авиақатновлар йўлга қўйилади. Бу ҳақда Транспорт вазирлиги хабар берди.
Маълум қилинишича, 25–31 май кунлари “Узбекистан Airways”, “Силк Avia” ҳамда “Cентрум Air” авиакомпаниялари томонидан ушбу йўналишларда бориш ва қайтиш учун жами 28 та қўшимча рейс амалга оширилади.
Қўшимча қатновларнинг 10 таси Тошкент — Урганч — Тошкент, 7 таси Тошкент — Бухоро — Тошкент, яна 7 таси Тошкент — Термиз — Тошкент ҳамда 4 таси Тошкент — Нукус — Тошкент йўналишларига тўғри келади.
Ушбу қатновлар орқали қарийб 9 минг нафарга яқин йўловчини ўз манзилига етказиш режалаштирилган.
Айни пайтда амалдаги жадвалга кўра, ҳафтасига Тошкент — Бухоро йўналишида 23 та, Тошкент — Термиз йўналишида 23 та, Тошкент — Урганч йўналишида 35 та ҳамда Тошкент — Нукус йўналишида 16 та рейс бажарилмоқда. Умумий ҳафталик қатновлар сони 97 тани ташкил этади.
