Сўнгги қўнғироқ арафасида ўқувчилар машина бошқаришига қарши рейд кучайтирилди
ЙҲХХ ўқувчилар ва уларнинг ота-оналарига мурожаат билан чиқди.
Йўл ҳаракати хавфсизлиги хизмати сўнгги қўнғироқ тадбирлари олдидан ўқувчилар ва уларнинг ота-оналарига мурожаат билан чиқди.
Маълум қилинишича, вояга етмаганлар иштирокидаги йўл-транспорт ҳодисаларининг олдини олиш мақсадида республика бўйлаб кенг кўламли тарғибот ва рейд тадбирлари ўтказилмоқда. Бунга кейинги пайтларда ҳайдовчилик гувоҳномасига эга бўлмаган ўқувчиларнинг автомобиль бошқараётгани ва бунинг оқибатида кўнгилсиз ҳолатлар юз бераётгани сабаб бўлган.
ЙҲХХ ўқувчиларни ҳайдовчилик ҳуқуқига эга бўлмасдан автомобиль бошқармасликка чақирди.
“Азиз битирувчилар, йўл ҳаракати қоидалари бўйича етарли билим ва кўникмага, шунингдек ҳайдовчилик ҳуқуқига эга бўлмасдан туриб, автомобиль йўлларида ўзингизни қурбон қилманг”, — дейилади мурожаатда.
Шунингдек, ота-оналардан фарзандларига автомобиль калитини бермаслик сўралди.
“Фарзандингизнинг бир лаҳзалик қувончига ҳисса қўшаман деб, унинг келажагига зиён етишига сабабчи бўлиб қолманг”, — дея огоҳлантирди ЙҲХХ.
Қайд этилишича, рейдлар давомида аниқланган ҳар бир қоидабузарлик учун қонунчиликда белгиланган чоралар кўрилади.
Эслатиб ўтамиз, 20 май куни Қўқонда вояга етмаган ҳайдовчи Malibu-2 автомобилида 10 ёшли уч нафар қизни уриб юборганди. Оқибатда улардан бири вафот этган. Ҳолат юзасидан жиноят иши қўзғатилиб, вояга етмаган ҳайдовчи процессуал тартибда ушланган.
