Сенатор ёшлар бандлиги ва ижтимоий ҳимояси юзасидан сенаторга сенатор сўрови юборди

Сенатнинг Ёшлар, хотин-қизлар, маданият ва спорт масалалари қўмитасида доимий асосда ишловчи сенатор Малика Қодирхонова ёшлар бандлиги ва ижтимоий ҳимояси масалалари юзасидан Ёшлар ишлари агентлиги директорига сенатор сўрови юборди.

 

Маълум қилинишича,  сўровда ижтимоий ҳимояга муҳтож вояга етмаган ёшларнинг ҳуқуқий ва ижтимоий ҳимоясини кучайтириш, уларни касб-ҳунарга ўқитиш ҳамда иш билан таъминлаш масалаларига эътибор қаратилган.

 

Сенатор сўровида 2026 йил апрель ҳолатига кўра, Ички ишлар вазирлиги тизимидаги вояга етмаганларга ижтимоий-ҳуқуқий ёрдам кўрсатиш марказларидан 14 638 нафар 16–17 ёшли ўсмир оиласига қайтарилгани, уларнинг 2 671 нафари эса ID-картага эга эмаслиги келтирилган.

 

Қайд этилишича, оиласи бағрига қайтган ёшларнинг аксарияти ижтимоий ҳимояга муҳтож ва яшаш шароити оғир оилалар фарзандларидан иборат. Молиявий имкониятлар чеклангани сабабли айрим вояга етмаганлар ўз вақтида ID-карта ололмаётгани таъкидланган.

 

Сенаторнинг фикрича, бу ҳолат ёшларни касб-ҳунарга ўқитиш, бандлигини таъминлаш ва ижтимоий дастурларга жалб этишда қатор муаммоларни келтириб чиқармоқда.

 

Сўровда амалдаги қонунчиликка мувофиқ, Ёшлар ишлари агентлигининг ижтимоий ҳимояга муҳтож ёшларни қўллаб-қувватлаш, уларни касб-ҳунарга ўқитиш, тадбиркорликка йўналтириш ва бандлигини таъминлаш бўйича вазифалари белгилангани ҳам эслатиб ўтилган.

 

Шу муносабат билан агентликдан ижтимоий ҳимояга муҳтож вояга етмаган ёшларни қўллаб-қувватлаш, ID-картаси мавжуд бўлмаган ёшларни касб-ҳунарга ўқитиш ва иш билан таъминлашга кўмаклашиш, уларни манзилли қўллаб-қувватлаш бўйича режалаштирилган чоралар ҳақида маълумот тақдим этиш сўралган.

 

Шунингдек, вояга етмаганлар ўртасида ишсизлик сабабларини ўрганиш, уларни бартараф этиш юзасидан ишлаб чиқилган таклифлар ҳамда масъул идоралар ўртасидаги ҳамкорлик механизмларини такомиллаштириш бўйича амалга оширилаётган ишлар ҳақида асослантирилган ахборот бериш талаб қилинган.