Ўзбекистон Қурбон ҳайити арафасида Афғонистонга навбатдаги инсонпарварлик ёрдами юборди
Балх вилоятига 200 тонна озиқ-овқат маҳсулотидан иборат гуманитар ёрдам етказилди.
Ўзбекистон томонидан Қурбон ҳайити муносабати билан ҳамда Афғонинстоннинг сел-сув тошқинларидан жабр кўрган аҳолисини қўллаб-қувватлаш мақсадида навбатдаги инсонпарварлик ёрдами етказилган. Бу ҳақда Сурхондарё вилояти ҳокимлиги маълум қилди.
Шавкат Мирзиёев топшириғига биноан юборилган қарийб 200 тонна озиқ-овқат маҳсулотлари ортилган инсонпарварлик юклари Афғонистоннинг Балх вилоятига олиб борилган.
Инсонпарварлик ёрдамини топшириш маросими Ҳайратон шаҳридаги «Астрас» компанияси ҳудудида бўлиб ўтган. Унда Ўзбекистон Президентининг Афғонистон бўйича махсус вакили Исматилла Иргашев, Сурхондарё вилояти ҳокими Улуғбек Қосимов ҳамда Балх вилояти губернатори ўринбосари Нурулҳоди Абуидрис ва икки томон расмийлари иштирок этган.
Юк таркибидан ун, гуруч, шакар, макарон ва қандолат маҳсулотлари, ўсимлик ёғи, нўхот ҳамда тез тайёрланадиган озиқ-овқат маҳсулотлари ўрин олган.
Афғонистон томони Ўзбекистон Президенти ва халқига кўрсатилаётган доимий инсонпарварлик кўмаги учун миннатдорлик билдириб, Қурбон ҳайити муносабати билан самимий табрикларини йўллаган.
