Тошкентда BYD ва автобус иштирокида аянчли ЙТҲ содир бўлди
Шифохонага олиб кетилган ҳайдовчиларнинг аҳволи номаълум.
2-июн куни Тошкент шаҳрида “Yutong” русумли автобус ва “BYD” русумли енгил автомобил иштирокида йўл-транспорт ҳодисаси содир бўлди. Бу ҳақда Тошшаҳартрансхизмат Ахборот хизмати хабар берди.
Дастлабки маълумотларга кўра, соат 15:28 ларда “Тошшаҳартрансхизмат” таркибидаги “2-Автобус саройи” филиали тасарруфидаги, 16-сонли йўналишда ҳаракатланаётган “Yutong” русумли автобус ҳайдовчиси К.Д. Миробод тумани “Нукус” кўчаси бўйлаб ҳаракатланиб, “Нукус” ва “Т. Шевченко” кўчалари кесишмасида чапга бурилиш маневрини амалга оширган.
Шу вақтда қарама-қарши йўналишда келаётган “BYD” русумли автомобил ҳайдовчиси чорраҳада светофорнинг тақиқловчи қизил чироғига бўйсунмасдан ҳаракатланиши оқибатида автобус билан тўқнашув юз берган ва йўл-транспорт ҳодисаси содир бўлган.
Дастлабки маълумотларга кўра, автобус ҳайдовчиси ҳамда “BYD” автомобили ҳайдовчиси тез тиббий ёрдам ходимлари кузатувида Республика 1-сонли клиник шифохонасига юборилган.
Ҳодиса Тошкент шаҳар ИИББ Йўл ҳаракати хавфсизлиги бошқармаси масъул ходимлари томонидан белгиланган тартибда расмийлаштирилган.
