Эрон Қувайт халқаро аеропортига авиазарба берди
Аеропорт фаолияти вақтинча тўхтатилган.
Қувайт халқаро аеропортининг йўловчи терминалига Эроннинг дрон ва ракеталар билан уюштирилган ҳужум оқибатида бир неча киши жароҳат олди. Бу ҳақда мамлакат Мудофаа вазирлиги ҳамда фуқаро авиацияси идоралари маълум қилди.
Мудофаа вазирлиги вакили полковник Сауд Абдулазиз ал-Аттвоннинг билдиришича, аеропортнинг Т1 йўловчи терминали бир нечта учувчисиз учиш аппаратлари томонидан нишонга олинган. Ҳужум натижасида моддий зарар етган ва жароҳатланганлар қайд этилган.
Қувайтнинг КУНА ахборот агентлиги хабарига кўра, ҳодисадан сўнг аеропортда фавқулодда вазиятларга жавоб бериш режаси ишга туширилган. Ҳаво ҳужуми аеропорт инфратузилмасининг айрим обектларига зарар етказган.
Хавфсизликни таъминлаш мақсадида аеропорт фаолияти вақтинча тўхтатилган. Чиқувчи рейслар кечиктирилган, кирувчи самолётлар эса бошқа аеропортларга йўналтирилмоқда.
Қувайт Қуролли Кучлари вазиятни назорат қилаётганини ва юзага келиши мумкин бўлган ҳар қандай таҳдидларга жавоб беришга тайёр эканини маълум қилган.
