Ғазода кучли ёмғир: 70 мингта чодирни сув босди

Ғазо секторида мавсумнинг илк қишки бўрони оқибатида кўчирилган фаластинликлар яшаётган 70 мингга яқин чодирни сув босди. Дастлабки зарар тахминан 3 миллион долларга баҳоланмоқда. Бу ҳақда Ғазо ҳукумати матбуот идорасига таяниб, Al Jazeera хабар берди.

 

7 ноябрь куни эълон қилинган баёнотга кўра, бўрон бошланганидан кейинги 12 соат ичида ўнлаб деворлар қулаб тушган, бир неча киши жароҳатланган. Шунингдек, аввалги ҳужумларда шикастланган ва қулаш хавфи остида турган бинолар аҳоли учун қўшимча таҳдид туғдирмоқда.

 

Ғазо фуқаролик мудофааси хизмати директорининг Al Jazeera телеканалига берган интервьюсида қутқарув гуруҳларида сув босган оилаларга ёрдам бериш учун ҳатто брезент ва чодирлар ҳам йўқлигини айтди. Унинг таъкидлашича, хизмат ходимлари фақат инсонлар ҳаётини сақлаб қолишга эътибор қаратмоқда.

 

Бўрон Ғазонинг соғлиқни сақлаш тизимига ҳам зарар етказган. Ғазо шаҳридаги ал-Шифо тиббиёт мажмуаси директори Муҳаммад Абу Салмия шифохонанинг шошилинч ёрдам бўлимини сув босгани ва у тўрт соатга яқин ишламай қолганини маълум қилди.

 

У ёмғир суви чодирлар ичидаги оқова сувлар билан аралашиб кетиши сабабли ошқозон-ичак, нафас йўллари ва тери инфекциялари кўпайиши мумкинлигидан огоҳлантирди. Шунингдек, совуқ ва нам шароит янги туғилган чақалоқлар ҳаётига жиддий хавф туғдираётганини таъкидлади.

 

Al Jazeera мухбирининг хабар беришича, минглаб кўчирилган оилалар Ғазо соҳилларида чодирларда яшамоқда. Улар кучли шамол, ёмғир ва денгиз суви сатҳининг кўтарилиши хавфи остида қолган. Кўплаб чодирлар кўчирилишнинг дастлабки йилида ўрнатилган бўлиб, тўрт йилдан бери ямаб-ямоқ ҳолда фойдаланилмоқда.

 

Сулҳнинг гуманитар протоколига мувофиқ, чодирлар ўрнига йиғма уйлар етказиб берилиши керак эди. Бироқ Исроил уларни Ғазога олиб киришга рухсат бермаган.

 

Фаластин нодавлат ташкилотлари тармоғи директори Муҳаммад Салҳанинг айтишича, ҳозир Ғазога кунига 180–200 та юк машинаси кириб келмоқда. Бу гуманитар протоколда келишилган 600 та юк машинасидан анча кам. Уларнинг атиги 40 га яқини гуманитар ёрдам ташийди.

 

Салҳа Миср чегарасининг Ғазо томонида 50 мингта чодир олиб кирилишини кутиб турганини билдириб, халқаро ҳамжамиятни ёрдам юкларининг ҳудудга етказилишига эришиш учун фаолроқ ҳаракат қилишга чақирди.